Мәскәүҙә Республика көндәре үтә

Мәскәүҙә Башҡортостан Республикаһы көндәре сиктәрендә мәғариф өлкәһендә саралар үтә: эшлекле осрашыуҙар, тәжрибә уртаҡлашыу, килешеүҙәргә ҡул ҡуйыу, экскурсиялар.Тармаҡтың көнүҙәк мәсьәләләре тураһында һөйләшеүҙәр үтте, улар - мәктәп туҡланыуын ойоштороу, мәктәп формаһы, ғалимдарҙы балалар менән эшләүгә йәлеп итеү, үҫеш фондтары менән хеҙмәттәшлек итеү һәм башҡа темалар. Бынан тыш, республика мәктәптәре менән Мәскәү технопарктары араһында хеҙмәттәшлекте нығытыу, һәләтле балалар менән эште көсәйтеү планлаштырыла.

Республиканың Мәғариф министры вазифаһын башҡарыусы Айбулат Хажин етәкләгән делегацияға республика министрлығы вәкилдәре һәм 20 белем биреү ойошмаһы етәксеһе инде.

Мәктәп директорҙары “Сколково” инновациялар үҙәген, Стратегик тикшеренеүҙәр агентлығының “Ҡайнау нөктәһе”н, “Просвещение” нәшриәт йортон, Мәскәүҙең алдынғы белем биреү ойошмаларын ҡараны, баш ҡалалағы коллегалары менән аралашты.

Мәғариф өлкәһендәге осрашыуҙар һәм тәжрибә уртаҡлашыуҙар бының менән генә тамамланмай. Бөгөн һәм иртәгә улар дауам итәсәк.