Был аллея салауаттарҙың иң яратҡан урынына әйләнер

Салауаттың Ленин урамындағы аллеяһында төҙөкләндереү башланды.

Ҡала хакимиәте башлығы Динар Хәлилов белдереүенсә, быйыл был урамдағы аллеяның Октябрь урамынан алып Калинин урамына тиклемге өлөшө эшләнәсәк. Йәйәүлеләр юлына шаҡмаҡлап ваҡланған таш һалынасаҡ, яҡтыртыу ҡоролмалары, эскәмйәләр, сүп-сар һауыттары ҡуйыласаҡ. Әлеге ваҡытта юлдағы иҫке асфальт һәм ҡоймалар алына.

Эштәр тамамланғанға тиклем аллея территорияһы ябыла, шуға күрә салауаттарҙың ваҡытлы уңайһыҙлыҡтарға аңлап ҡарауын һорай ҡала хужалығы идаралығы.