Ғәҙәттәгесә, ололар әүҙем

Салауат һайлау участкаларына яйлап ҡына халыҡ ағыла. Улар араһында иң әүҙем һайлаусылар, әлбиттә, оло быуын вәкилдәре.

Камил Әмиров - иң оло һайлаусыларҙың береһе. 89 йәшен тултырған ағайыбыҙ дәртле итеп баҫып “Ағиҙел” мәҙәни-ял үҙәгендә урынлашҡан 600-се һайлау участкаһына килеп инде лә, көр тауыш менән барыһын да байрам менән ҡотланы.

- 90 йәшкә баҫырға торам, бер ваҡытта ла һайлауҙан ҡалғаным юҡ, - ти мәғариф өлкәһе ветераны. - 50 йылға яҡын мәктәп директоры булып эшләнем, беҙҙең өсөн тауыш биреү - ул изге бурыс булып һаналды. Аллаға шөкөр һаулығым шәп, шулай булғас бөгөн дә гражданлыҡ бурысымды намыҫ менән үтәйем.

600-се һайлау участкаһының рәйесе Рөстәм Таңатаров әйтеүенсә, был һайлау участкаһы исемлегендә 1133 һайлаусы. Участка комиссияһында 12 кеше эшләй, ҡала ирекмәндәре ярҙам итә. 8 кешегә өйҙәре барып, тауыш бирҙереү ҡаралған.