Һайлау нисек уҙа?

Башҡортостан Республикаһы Үҙәк һайлау комиссияһы рәйесе урынбаҫары Марат Ғәҙелов журналистар менән үткәргән брифингта Берҙәм тауыш биреү көнөндәге дөйөм эш барышы, Үҙәк һайлау комиссияһындағы "Ҡыҙыу линия"ның эшмәкәрлеге, алынған ялыуҙар һәм мөрәжәғәттәр тураһында һөйләне.18.00 сәғәткә Башҡортостан халҡының 57 проценты үҙенең гражданлыҡ бурысын үтәгән, был 1 миллион 720 мең һайлаусы тауыш биргән тигән һүҙ. Ҡалалар буйынса Сибай (62 процент) һәм Күмертау (61 процент) алда бара. Райондар араһында иң әүҙеме - Тәтешле (92,1), Миәкә (81,8) һәм Салауат (78 процент). Һайлау кампанияһы барышында республика Үҙәк һайлау комиссияһына - 190, бөгөн 15 мөрәжәғәт ҡабул ителгән. Бынан тыш, июнь уртаһынан алып эшләп килгән "Ҡыҙыу линия"ға 1502 шылтыратыу алынған. Бөгөнгө көн барышында 250 һайлаусы төрлө һорауҙар менән шылтыратҡан. Мөрәжәғәттәр, башлыса, һайлау участкаһының адресын билдәләү, өйҙә тауыш биреү кеүек һорауҙарға ҡағылышлы булған. Марат Венер улы белдереүенсә, һайлау кампанияһы барышында һәм Берҙәм тауыш биреү көнөндә артыҡ ҙур тәртип боҙоуҙарға юл ҡуйылмаған.