Тотҡондарҙы азат иткән ветеранды туҡмағандар

Өфөлә Бесланда тотҡондарҙы азат иткән ветеранды кома хәленә еткергәнсе туҡмағандар. Александр Воронцов - Кавказдағы хәрби бәрелештәр ветераны. 2004 йылда ул тотҡондарҙы азат итеү операцияһында ҡатнашҡан. Ул саҡта террорсылар Бесландағы 1-се мәктәпте баҫып алғайны. Яҡташыбыҙ үҙ ҡулдары менән балаларҙы мәктәптән алып сыҡҡан. Хеҙмәтен тултырғас, тыуған яғына - Өфөгә ҡайтҡан.

Июль айында Дим биҫтәһендә өйөнә ҡайтып барған ваҡытта ул балалар уйнап йөрөгән тар ғына урамда бер егеттең мотоциклда ҙур тиҙлек менән йөрөгәнен күреп ҡалған. Александр уға иҫкәрмә яһаған. Мотоциклсы, күрәһең, үпкәсел булып сыҡҡан. Ул дуҫтарын саҡырған һәм улар, Воронцовтың өйөнә килеп, уны таяҡ менән кома хәленә еткергәнсе туҡмаған. Александрҙы дауаханаға оҙатҡандар һәм операция ваҡытында баш һөйәгенең бер өлөшөн алып ташлағандар. Әле ул дауаханала. Команан сыҡҡан, ләкин кәүҙәһенең һул яғы йөрөмәй. Александрҙың әсәһе вайымһыҙ булмаған кешеләрҙән һәм хәйриә ойошмаларынан ярҙам һорай. Ғәҙәттән тыш хәлдәр министрлығында «Һаулыҡҡа ауыр зыян килтереү» статьяһы буйынса енәйәт эше ҡуҙғатыуҙары билдәле, ләкин туҡмаған кешеләрҙең береһе лә тотолмаған. Александр иһә Бесланда матәм саралары көндәрендә, ғәҙәттәгесә, йәнә ошо мәктәпкә барыу өсөн тиҙерәк аяғына баҫырға хыяллана.