Йәштәрҙең үҙ хөкүмәте. Унда кемдәр ингән?

Йәштәр хөкүмәте – Башҡортостан Республикаһы Хөкүмәте ҡарамағындағы кәңәшләшеү майҙансығы. Эшмәкәрлеген йәмәғәт башланғыстарында тормошҡа ашыра. Башҡортостан Республикаһының Йәштәр хөкүмәте составына 18-30 йәшлек 19 кеше инде. Артабан улар, стажировка үтеп, дәүләт хеҙмәтендә карьера башлау мөмкинлегенә эйә була. Йәштәр хөкүмәте ике йылға һайланып ҡуйылған рәйестән, уның урынбаҫарынан, ағзаларҙан тора.

Яңыраҡ Йәштәр хөкүмәтенең тәүге ултырышы уҙҙы.Унда Йәштәр хөкүмәте рәйесе, урынбаҫары һәм секретары һайланды. Рәйесе - Ислам Төхвәтуллин, уның урынбаҫары - Алексей Прокофьев, секретары - Айгөл Юлдашбаева.

Йәштәр хөкүмәте составынан һәр тармаҡ буйынса үҙенең министры һайланды. Әйтәйек, иҡтисади үҫешкә - Гөлназ Ишмөхәмәтова, ер һәм мөлкәт мөнәсәбәттәренә - Альберт Арыҫланов, һаулыҡ һаҡлауға - Айгөл Нуриева, эшҡыуарлыҡ һәм туризмға - Азамат Байрамғолов, мәғарифҡа - Александр Понамарев, торлаҡ-коммуналь хужалыҡҡа - Тимур Рамазанов, мәҙәниәткә - Миләүшә Шәрипова, спортҡа Элина Хисамова яуаплы.