Тәүге сабыйға түләү шарты икенсе

Килеме ике йәшәү минимумынан кәм булған мохтаж ғаиләләр 2020 йылдан тәүге сабыйҙары өсөн түләү аласаҡ. Ошо хаҡта ил Хөкүмәте Премьер-министры Дмитрий Медведев Дәүләт Думаһында Хөкүмәттең эше тураһындағы йыллыҡ отчет биргәндә белдерҙе.

Тәүге балалары донъяға килгән ата-әсәләргә матди ярҙам мәсьәләһе былтыр күтәрелгәйне. Ул саҡта һүҙ килемдәре 1,5 йәшәү минимумы күләменән аҙ булған ғаиләләр хаҡында барҙы. Яңы үҙгәрештәр түләү алыусылар исемлеген арттырасаҡ.