Газонға ҡуя күрмә

Башҡортостанда газондарҙа һәм балалар майҙансыҡтарында машиналарҙы ҡалдырған өсөн штраф индерелде. Дәүләт Йыйылышы депутаттары пленар ултырышта республиканың Административ хоҡуҡ боҙоуҙар тураһындағы кодексына тейешле үҙгәрештәр индерҙе.

Штрафтар күләме: граждандарға - беренсе тапҡыр 1-2 мең һум, йәнә хоҡуҡ боҙған өсөн 3-4 мең; вазифалы кешеләргә - беренсе тапҡыр 5-10 мең һум һәм йәнә хоҡуҡ боҙған өсөн 10-15 мең; юридик берәмектәргә - беренсе тапҡыр 20-30 мең һум һәм йәнә хоҡуҡ боҙған өсөн 35-50 мең.

Билдәләнеүенсә, протоколды райондарҙағы административ комиссиялар төҙөй, штрафты ла улар яҙа. Берәйһенең газонда, балалар йәки спорт майҙансығында машинаһын ҡалдырып киткәнен күргән кешеләр ҙә комиссияға ялыуҙар менән мөрәжәғәт итә ала.