Сибайға ла "эләкте"

Радий Хәбиров Сибай һәм Учалы тау-байыҡтырыу комбинаты етәкселеген ҡалалағы экологик хәл өсөн тәнҡитләне.

Хәтерегеҙгә төшөрәбеҙ, Сибайҙы йәнә әсе төтөн ҡапланы. Карьер төбөнә йыйылған газ өҫкә сыға. Кешеләр ҡалалағы ҡуйы томандың фотоһын һәм видеоһын социаль селтәргә һала. Тын алып булмай, тип яҙалар.

«Төтөн ҡаплаһа, өйҙән сыҡмайбыҙ һәм форточканы ябабыҙ», - тип яҙа улар.

Сибай мэрыхалыҡ араһында аңлатыу эштәрен бик сифатһыҙ алып бара, тип билдәләне республика башлығы.

«Уларға аңлатырға һәм дөрөҫ мәғлүмәт бирергә кәрәк, - тине ул. - Халыҡ һауалағы зарарлы матдәләр сиге ниндәй икәнен аңлаһын өсөн мотлаҡ рәүештә атмосфераға сығарылған зарарлы матдәләрҙең асыҡ мониторинг системаһын эшләрбеҙ».

Хәбиров урындағы хакимиәт эшен штаб режимына күсерҙе, иртәле-кисле бысратыусы матдәләрҙең концентрацияһы һәм күрелгән саралар тураһында доклад яһалырға тейеш.