Илһөйәрҙәр тәрбиәләүсе уҡытыусы

Гөлдәр Ситдиҡова - 10-сы кластарҙың класс етәксеһе, башҡорт теле уҡытыусыһы,  өс байраҡ төркөмө етәксеһе, йәштәрҙе спорт менән шөғөлләнеүгә һәм тыуған яҡтың мәҙәниәтен өйрәнеүгә йәлеп иткән әүҙем педагог та, яратҡан ҡатын, әсәй һәм өләсәй ҙә.
Гөлдәр Ситдиҡова Стәрлебаш районының Ҡабыҡҡыуыш ауылында  тыуып үҫкән, мәктәпте лә шунда тамамлай. Бала саҡтан ҡыҙыҡһыныусан, мауығыусан һәм бик әүҙем була. Яҡшы  уҡый, вожатый булып эшләй, урындағы шаяндар һәм тапҡырҙар клубы уйындарында ҡатнаша.
- Уҡытыусы булырға ҡарар итеүемә мәктәп директоры, география уҡытыусыһы Хәмит Ғәлимов йоғонто  яһаны. Беҙ уның дәрестәрен, сәйәхәттәрен бик яраттыҡ, һәр саҡ яңы осрашыуҙы  түҙемһеҙләнеп көтә инек, - тип хәтерләй Гөлдәр Ситдиҡова.
Мәктәптән һуң әсәһенең кәңәше буйынса Салауат педагогия училищеһына (хәҙер Салауат белем биреү һәм һөнәри технологиялар  колледжы - ред.) уҡырға инә. Уны тамамлағандан һуң Ишембайҙағы гимназияға эшкә ебәрәләр.
- Тик мине Салауатҡа тартты - бында барыһы ла таныш һәм яҡын ине, - ти ул. - Салауат ҡалаһының 2-се мәктәбенә күстем, һуңынан ул кадет  мәктәбенә әйләнде. Бында 30 йыл эшләйем, ул тыуған йорт кеүек, уны яратам.
Гөлдәр Ситдиҡова параллель рәүештә Өфөләге Башҡорт дәүләт педагогия университетын «Башҡорт теле  уҡытыусыһы» һөнәре буйынса тамамлай.
- Миңә бәләкәстәр менән эшләү оҡшай ине, әммә ул саҡта башҡорт теле уҡытыусылары бик талап ителгәнгә күрә,  квалификациямды үҙгәртергә булдым, - тип уртаҡлаша педагог.
Гөлдәр Ситдиҡова мандолинала һәм ҡумыҙҙа уйнай, йырлай һәм бейей ҙә. 

- Элек түңәрәк алып барҙым һәм балаларҙы мандолинала уйнарға өйрәттем, дәрестәрҙә хәҙер ҡумыҙҙа уйнау  серҙәренә төшөндөрәм. Халыҡтар берҙәмлеге йәки Башҡорт теле көнөндә дәресте милли кейемдә үткәреүем балаларға оҡшай, - ти Гөлдәр Радик ҡыҙы.
Уҡытыусы уҡыусыларҙы башҡорт теле буйынса олимпиадаларға, конкурстарға һәм интеллектуаль уйындарға әҙерләй. 
- Йыл һайын уҡыусыларым араһында башҡорт теле буйынса төбәк-ара олимпиада  еңеүселәре бар. Былтыр, мәҫәлән, Света Абдуллина менән Айназ Хужәхмәтов,  быйыл Альбина Йәнегетова еңеү яуланы. Уҡыусыларым «Урал батыр» республика конкурсында ла әүҙем  ҡатнаша. Кадеттарҙың еңеүе һәм мәктәпте, ҡалабыҙҙы данлауы бик мөһим, - тип һөйләй педагог.
Кадеттар менән эште ул 2019 йылда майор Виктор Ивановтың тәжрибәһен ҡабул итеп башлай:
- Виктор Иванов минең балаларҙы конкурстарға һәм ярыштарға әҙерләрҙәй остаз була алыуымды  һиҙемләгәндер, күрәһең. Уның тәжрибәһен үҙләштерә башланым. Килеп сыҡты! 2019 йылда Мәскәүҙә беренсе конкурста минең уҡыусым
Яросвет Дубровин 19 секунд эсендә Калашников автоматын йыйып, һүтте. 

Уҡытыусы етәкселегендә балалар бер нисә тапҡыр  республика «Зарница»һында, йәш армиясылар уйындарында еңеү яулай.

 - Мин һәр ваҡыт спорт менән шөғөлләндем, балаларҙы ла шуға өйрәтәм. Уҡыусыларға уларҙың эргәһендә булып, ярҙам итеүем оҡшай, - тип аңлата Гөлдәр Ситдиҡова. - «Иң яҡшы кадет» республика конкурсында һәм кадет корпустары спартакиадаһында ҡатнашабыҙ.
Гөлдәр Ситдиҡова балаларҙы ҡала смотр-конкурсына әҙерләй, шулай уҡ йыл һайын Еңеү парадында ҡатнашҡан байраҡ  төркөмдәренә етәкселек итә. Әле мәктәптә өс байраҡ төркөмө бар.

Гөлдәр Радик ҡыҙы ярыштарға үҙенең класы уҡыусыларын ғына түгел, башҡа кластарҙан кадеттарҙы ла әҙерләй.
- Балалар бик һәләтле. Уларҙы бары тик әҙерләргә, улар менән шөғөлләнергә кәрәк. Кадет мәктәбен спортһыҙ, дисциплинаһыҙ күҙ алдына килтереү мөмкин түгел. Мин, моғайын, ошоноң менән янған кешеләрҙең береһелер. Мин үҙем - ысын кадет, - тип йылмая педагог.
Дәрестәр, класс етәкселеге, күнекмәләр һәм сәйәхәттәр... Уҡытыусы бөтә ергә нисек өлгөрә?
- Иң мөһиме - ваҡытыңды дөрөҫ планлаштырыу һәм уны бер ҡасан да бушҡа  сарыф итмәү. Мин эшемдең һөҙөмтәһен балаларҙа күрәм, уларҙың күҙҙәре янып тора, сараларҙа ҡатнашырға һәм еңергә теләктәре ҙур. Был кәйефте бик күтәрә. Ғаиләм, тормош иптәшем, яҡындарым миңә һәр саҡ терәк, - тине ул. 
Тығыҙ графикка ҡарамаҫтан, уҡытыусы мауығыу өсөн дә ваҡыт таба. 
- Һүрәт төшөрөргә яратам, бигерәк тә тәбиғәтте, сәскәләрҙе. Бөтә ҡатын-ҡыҙҙар кеүек, аш-һыу әҙерләргә  әүәҫмен. Хатта бер ваҡыт сәк-сәктән тирмә лә эшләнем, - тип хәтерләй ул. - Отпуск ваҡытында Башҡортостаныбыҙ буйлап сәйәхәт итергә яратам. Бында ғәжәйеп урындар күп! Иң яратҡан урыным - Хазина тарлауығы. Тауҙарҙы  яратам, уларҙың түбәһенә күтәрелеүҙән көс, илһам алам.
Гөлдәр Ситдиҡова үҙенең сығарылыш уҡыусылары менән йылы мөнәсәбәттәрҙә. Улар йыл һайын ҡунаҡҡа килә. Улай ғына түгел, үҙҙәренең балаларын да уға алып килә. Тимәк, уҡытыусыға, ысынлап, та ышаналар һәм яраталар.

Алена БИЗИКИНА фотолары.