Туризм һәм ҡунаҡсыллыҡты үҫтереүгә яңы аҙым

Сара тантаналы линейка менән башланды. Колледж директоры Зөлфиә Ишембәтова «Профессионалитет» проектының әһәмиәтен аңлатып, яңы уҡыу йылы башланыуы менән студенттарҙы ҡотланы һәм уларға яңы белем кимәленә ирешеүҙә уңыштар теләне.
Салауат ҡалаһының туризм һәм тыуған яҡты өйрәнеү балалар һауыҡтырыу-белем биреү үҙәге директоры Илдус Мөсәлимов, колледждың күптәнге партнеры һәм эш биреүсеһе булараҡ, студенттарҙы ҡотланы. Ул йәштәргә белем алыу менән бер рәттән, иҡтисадта талап ителгән практик күнекмәләрҙе лә әүҙем үҙләштерергә саҡырҙы.
Салауат ҡалаһы хакимиәте башлығының социаль мәсьәләләр буйынса урынбаҫары Ирина Александровна Борисова үҙенең йылы теләктәрен еткерҙе, студенттар һайлаған һөнәрҙәрҙең мөһимлеген һәм уларҙың ҡала үҫешенә индерәсәк өлөшөн билдәләне.
Махсус хәрби операцияла ҡатнашыусы Әсҡәт Ғибәҙуллиндың сығышы айырыуса тәҫоратлы булды. Ул үҙенең миҫалында ныҡышмалылыҡ һәм бурысҡа тоғролоҡ хеҙмәттә лә, уҡыуҙа ла уңышҡа өлгәшергә ярҙам иткән сифаттар икәнен иҫбатланы.
Был сарала шулай уҡ Рәсәй Федерацияһы Федераль Йыйылышы Дәүләт Думаһы депутаты Зариф Байғусҡаров, Салауат ҡалаһы хакимиәте башлығы Марат Зәһиҙуллин, Салауат ҡалаһы хакимиәте эштәре менән идара итеүсе Семен Евграфов һәм «Берҙәм Рәсәй» партияһы Башҡортостан төбәк бүлегенең урындағы бүлексәһенең башҡарма секретары Гөлнара Сөләймәнова кеүек абруйлы ҡунаҡтар ҡатнашты.
Салауат белем биреү һәм һөнәри технологиялар колледжында асылған яңы үҙәк, төбәктең иҡтисадын һәм урта һөнәри белем биреү системаһын үҫтереү өсөн яңы мөмкинлектәр аса. Колледж 2024 йылда «Профессионалитет» федераль проекты сиктәрендәге гранттар конкурсында еңеп, был үҙәкте булдырыуға федераль бюджеттан субсидиялар алды.
Яңы кластерға Салауаттан тыш, тағы ла Дыуан, Белорет, Стәрлетамаҡ, Ауырғазы, Өфө ҡалаларынан барлығы 9 урта һөнәри белем биреү ойошмаһы инә.
2025 йылда колледж базаһында туризм, ҡунаҡсыллыҡ, ресторан сервисы, икмәк бешереү һәм мәғлүмәт технологиялары кеүек 13 зона йыһазландырылған. Кластерҙың 10 эш менән тәьмин итеүсе партнеры бар, улар араһында - «Торатау геопаркы», «Башҡортостан Республикаһының туризмды үҫтереү үҙәге», «Башҡортостан» милли паркы, «Красноусол» шифаханаһы, «Винсент» ҡунаҡханаһы һәм башҡалар.
Был ваҡиға Салауат ҡалаһының һәм бөтә Башҡортостан Республикаһының туризм һәм ҡунаҡсыллыҡ тармағын үҫтереүгә ҙур өлөш индереүгә, яңы быуын белгестәрен әҙерләүгә булышлыҡ итеүгә йүнәлтелгән. Уҡыусылар өсөн был – заманса белем алыу, практик күнекмәләр туплау һәм киләсәктә юғары эш хаҡлы эштәр табыу мөмкинлеген арттырыу тигәнде аңлата. Колледж етәкселеге һәм уҡытыусылар коллективы яңы үҙәктең уңышлы эшләй башлауына ышаныс белдерҙе һәм студенттарҙың яңы мөмкинлектәрҙе тулыһынса файҙаланып, һайлаған һөнәрҙәре буйынса юғары ҡаҙаныштарға ирешеүен теләне. Бындай үҙәктәрҙең асылыуы – белем биреү системаһын заман талаптарына ярашлы үҫтереүҙең, иҡтисадтың мөһим тармаҡтарына талап ителгән кадрҙар менән тәьмин итеүҙең бер аҙымы булып тора.