Дөрөҫ йүнәлеш табыу

Ярышҡа республиканың төрлө райондарынан һәм ҡалаларынан 166 спортсы, улар араһында Салауаттың балалар туризмы һәм тыуған яҡты өйрәнеү үҙәгенең «Туристик минимум» берекмәһе тәрбиәләнеүселәре сыға. Командаға юғары әҙерлек кимәле һәм команда рухы күрһәткән 21-се мәктәптең 5б класынан Дамир Сөләймәнов, Данис Сәғәҙәтов, Марат Яппаров, 6а класс уҡыусылары Ибраһим Күсмәев һәм Александр Козлов, 9в синыфынан Александр Волков һәм 8-се лицей уҡыусыһы Елизар Стасевич инә. Балалар дөйөм команда зачетында өсөнсө урынды яулай.

- Балалар «Саңғы ярышы - билдәләнгән трасса» дисциплинаһын үтте. Һәр ҡатнашыусы стартта карта алып, флагтар менән билдәләнгән саңғы юлы буйлап шыуҙы һәм осраған контроль пункттарҙы картаға төшөрҙө. Һөҙөмтәлә арауыҡты саңғыла тиҙ үтеү ваҡыты һәм контроль пункттарҙың картаға теүәл итеп төшөрөлөүе иҫәпкә алынды, - тип һөйләй 21-се мәктәптең география уҡытыусыһы, «Туристик минимум» берекмәһе етәксеһе Алһыу Юлдашбаева.

Саңғыла спорт ориентиры ҡатнашыусыларҙан физик сыҙамлыҡ ҡына түгел, ә тиҙ ҡарарҙар ҡабул итеү, тәғәйен маршрутты табыу һәм картаны дөрөҫ ҡулланыу һәләтен дә талап итә. Уҡыусыларға бындай алымдарға уларҙың уҡытыусылары Ринат Дилмөхәмәтов һәм Алһыу Юлдашбаева өйрәткән.

- Ринат Рафаэль улы ярыштың бөтә нескәлектәрен картала ентекләп тикшереп, беҙҙе ориентирлашыу теорияһы менән таныштырҙы. Йыл дауамында Алһыу Марс ҡыҙы менән белемдәребеҙҙе практикала нығыттыҡ: ҡыш буйына саңғыла күнекмәләр яһаныҡ, унда ул беҙҙе карта менән дөрөҫ эшләргә өйрәтте. “Салауат саңғы юлы”ын асыуҙа һәм йүгереү буйынса М.Семенов кубогында ҡатнашыу беҙҙең әҙерлектең мөһим этабы, - тип уртаҡлаша Александр Волков.

- Мин саңғыға бала саҡта ауылда торҙом, әммә ныҡлап былтыр ғына мауыға башланым. Өфөлә мине яңы, өйрәнелмәгән трассалар, ярыштарҙың яҡшы ойошторолоуы һәм саңғы юлының матурлығы хайран ҡалдырҙы. Беҙ шыуышып йөрөгән ерҙә урман бик матур ине, - ти Ибраһим Күсмәев.

- Саңғыла шыуғанда ҡаланың шау-шыуын онотаһың һәм тәбиғәттең матурлығына һоҡланаһың. Ярыштар барышында мин теорияны практикала яҡшыраҡ аңлай башланым. Был беҙҙең тәүге стартыбыҙ. Мин «Триумф» спорт мәктәбендә саңғы менән шөғөлләнәм, шуға күрә был сәфәр минең өсөн бик файҙалы булды, - тип уртаҡлаша Елизар Стасевич.

Уҡыусылар спорт менән шөғөлләнеүен дауам итергә һәм ярыштарҙа әүҙем ҡатнашырға ниәтләй. Улар үҙҙәренең оҫталығын үҫтереү өсөн яңы еңеүҙәргә ынтыла. Походтарға һәм ялан лагерҙарына сығыу ҙа уларҙың пландарының мөһим өлөшө. Был команда рухын нығытыу һәм тәжрибә алыу өсөн бик яҡшы мөмкинлек. Тап ошондай ярыштар ваҡытында балалар ябай нәмәләрҙе ҡәҙерләргә, бер-береһе менән уртаҡ тел табырға һәм ауырлыҡтарҙы бергә еңеп сығырға өйрәнә.

Гөлиә Нуриманова.
Автор фотоһы.