Һәр мөрәжәғәт артында - яҙмыш

Республика Дәүләт Йыйылышы-Ҡоролтайға Мөрәжәғәтнамәһендә Башҡортостан Башлығы Радий Хәбиров ҡатнашыусыларға ярҙам итеүҙе 2026 йылға төп бурыс, тип билдәләне. Төбәктә берҙәм тәҙрә принцибы буйынса эшләгән 30-ҙан ашыу ярҙам үҙәге булдырылған.
Яңы үҙәк урынлашҡан бинаға капиталь ремонт үткәрелде, был эштәргә 12 миллион һум аҡса «Газпром нефтехим Салауат» компанияһы тарафынан бүленде. «Газпром нефтехим Салауат» яуаплылығы сикләнгән йәмғиәтенең генераль директоры урынбаҫары, «Салауатинвест» яуаплылығы сикләнгән йәмғиәте директоры, капиталь ремонт барышына шәхсән үҙе етәкселек иткән ҡала советы депутаты Рөстәм Казаков башланғысы менән үҙәк эргәһендә 20 алма ағасы ултыртылды. Экологик акция «Баҡса - быуындар бәйләнеше» Бөтә Рәсәй акцияһы сиктәрендә үтте.
Үҙәкте асыу тантанаһында ҡала хакимиәте вәкилдәре, хәрби операцияла ҡатнашҡан ветерандар һәм уларҙың ғаиләләре, йәмәғәт ойошмалары вәкилдәре, шулай уҡ йәш армиясылар һәм кадеттар ҡатнашты.
Башҡортостан Республикаһы Дәүләт Йыйылышы-Ҡоролтай рәйесе урынбаҫары Илшат Тажетдинов үҙәкте яңы структура итеп кенә түгел, ә реаль ярҙам һорап мөрәжәғәт итеү урыны итеп ҡабул итеүҙәрен теләне.
- Ярҙам - ул ябай формаллек түгел. Һәр мөрәжәғәт артында билдәле бер яҙмышлы конкрет кеше тора. Өйөнә ҡайтҡан бер генә яугир ҙа, ауыр юғалтыу кисергән бер генә ғаилә лә ауырлыҡтар менән яңғыҙ ҡалырға тейеш түгел. Үҙәккә мөрәжәғәт иткән һәр кем бында уны ишетеүҙәрен һәм аңлауҙарын тойор, тип ышанам, - тине Илшат Тажетдинов.
Илшат Тажетдинов яугирҙарға - алғы һыҙыҡта күрһәткән батырлыҡтары, уларҙың туғандарына ныҡлы тыл, ә ирекмәндәргә - гуманитар йөктәрҙе формалаштырыу буйынса баһалап бөткөһөҙ эше өсөн рәхмәт белдерҙе. Артабан ул үҙәкте булдырыуға индергән өлөшө өсөн «Газпром нефтехим Салауат» йәмғиәте хеҙмәткәрҙәренә һәм генераль директоры Евгений Семенькоға Башҡортостан Республикаһы Дәүләт Йыйылышы-Ҡоролтайҙың почет билдәһен тапшырҙы.
Салауат ҡалаһы хакимиәте башлығы Марат Зәһиҙуллин, үҙәк яугирҙар һәм уларҙың туғандары өсөн мөһим урын буласаҡ, тип ышандырҙы.
- Дошман йоҡламай, ә егеттәр Ватаныбыҙҙы һаҡлай. Улар өсөн беҙ берҙәм булырға тейеш. Шик юҡ: беҙ еңәсәкбеҙ. Был үҙәк берҙәмлек, өмөт һәм ярҙам йорто булһын, - тине ул.
Үҙәк бинаһын капиталь ремонтлауҙа бағымсылыҡ ярҙамы күрһәткән өсөн Марат Зәһиҙуллин Евгений Семенькоға рәхмәт хаты, шулай уҡ «Махсус хәрби операцияға ярҙам иткән өсөн» миҙалын һәм ғәскәри частың командирынан гуманитар ярҙам күрһәткәне өсөн грамота тапшырҙы.
- Был наградаларҙы алыу минең өсөн ҙур хөрмәт, - тине Евгений Семенько. - Беҙҙең предприятие даими нигеҙҙә яугирҙарға һәм уларҙың ғаиләләренә һәр яҡлап ярҙам күрһәтә. Үҙәкте булдырыу беҙҙең өсөн бик мөһим эш булды - һөҙөмтәһе менән ғорурланабыҙ! Проект предприятиебыҙҙың бөтә коллективы ярҙамында мөмкин булды. Был йүнәлештә артабан да эшләйәсәкбеҙ.
Марат Зәһиҙуллин ҡала хакимиәтенең рәхмәт хатын «Газпром нефтехим Салауат» йәмғиәтенең генераль директоры урынбаҫары, «Салауатинвест» йәмғиәте директоры, ҡала советы депутаты Рөстәм Казаковҡа тапшырҙы.
Гуманитар ярҙам күрһәткән өсөн «Махсус хәрби операцияға ярҙам иткән өсөн» миҙалына һәм ғәскәри частың командирынан грамотаға «Газпром нефтехим Салауат» йәмғиәтенең административ-хужалыҡ идаралығының протокол һәм йәмәғәт саралары бүлеге начальнигы Ольга Букреева, шул уҡ предприятиеның транспорт цехының йөк паркының алтынсы разрядлы автомобиль водителе Роберт Дауытов һәм «Мономер» заводының тауар-сеймал цехының баш инженертехнологы Алексей Макаров лайыҡ булды.
Республикала махсус операция ветерандарына, хәрби хәрәкәттәрҙә ҡатнашыусыларға һәм уларҙың ғаиләләренә шәхси ярҙамды «Ватанды һаҡлаусылар» дәүләт фонды координациялай. Филиал етәксеһе, Башҡортостан Республикаһы Дәүләт Йыйылышы-Ҡоролтай депутаты, «Башҡорт ҡатын-ҡыҙҙары йәмғиәте» төбәк йәмәғәт ойошмаһы рәйесе, «Рәсәй халыҡтары Ассамблеяһы» Дөйөм Рәсәй ижтимағи-дәүләт ойошмаһының төбәк бүлексәһе рәйесе Гөлнур Ҡолһарина тантананың абруйлы ҡунағы булды.
- Бындай тарихи ваҡиғала ҡатнашыуыма шатмын - Салауатта хәрби хәрәкәттәр ветерандарына һәм уларҙың ғаилә ағзаларына ярҙам үҙәге асыла. Ул бөтә яугирҙарыбыҙ, һәләк булған геройҙарыбыҙ һәм ирекмәндәребеҙ өсөн көс урыны буласаҡ, - тине ул.
Гөлнур Ҡолһарина Салауат хакимиәте башлығы Марат Зәһиҙуллинға «Ватанды һаҡлаусылар» дәүләт фондының почет грамотаһын тапшырҙы. Дәүләт фонды филиалы эшмәкәрлегенә булышлыҡ иткәне өсөн «Газпром нефтехим Салауат» яуаплылығы сикләнгән йәмғиәтенең генераль директоры Евгений Семенько рәхмәт хаты алды.
Башҡортостан Республикаһы ветерандары Ассоциацияһы МХО-ла ҡатнашыусыларға ярҙам итеүҙә айырым роль уйнай. Уның эшен беҙҙең төбәктә Башҡортостан Башлығы ярҙамсыһы, «Берҙәм Рәсәй» партияһының төбәк сәйәси советы Президиумы ағзаһы Оскар Ситдиҡов координациялай, хәрби - тәжрибәле һәм Ватанды һаҡлаусыларҙың ихтыяждарын тәрән аңлаған кеше.
- Үҙәк - ул бина ғына түгел, үҙәк - ул кешеләр. Уның халыҡҡа ярҙам күрһәтеүҙәге һөҙөмтәлеге бер-беребеҙгә булышыуҙан торасаҡ, - тине Оскар Ситдиҡов.
Башҡортостан Республикаһы Хөкүмәтенең ветерандарға һәм махсус хәрби операцияла ҡатнашыусыларға һәм уларҙың ғаилә ағзаларына ярҙам итеү мәсьәләләре буйынса департаменты етәксеһе Айҙар Шәйәхмәтов билдәләүенсә, үҙәктә салауаттар төрлө өлкәләрҙә квалификациялы белгестәрҙән ярҙам ала аласаҡ.
- Бында батырлыҡтар тураһында тарихтар һөйләйәсәк һәм йәмғиәтебеҙҙе нығытыуға йүнәлтелгән яңы башланғыстар барлыҡҡа киләсәк, - тип ышана ул.
Тантаналы асыуҙан һуң ҡунаҡтар үҙәктең мөмкинлектәре менән танышты. Бында махсус хәрби операцияла ҡатнашыусылар һәм ветерандар, хәрби хәрәкәттәр ветерандары, шулай уҡ уларҙың яҡындары һәм туғандары берҙәм тәҙрә режимында юридик, социаль, психологик ярҙам һәм медицина ярҙамы ала аласаҡ. Бынан тыш, үҙәктә социаль адаптация һәм реабилитация программалары тормошҡа ашырыласаҡ. Эште юристар, психологтар, ҡала хакимиәте хеҙмәткәрҙәре, мәшғүллек үҙәге хеҙмәткәрҙәре, Махсус хәрби операция ветерандары Ассоциацияһы вәкилдәре алып барасаҡ.
Ҡала хакимиәте башлығының социаль һорауҙар буйынса урынбаҫары Ирина Борисова үҙәктең эше хаҡында һөйләне.
- Бөгөнгө көнгә ҡайтҡан 113 хәрби хәрәкәт ветеранының 77-һе эшкә урынлаштырылған. Ҡалғандары хеҙмәт юлын башларға тора, социаль контракт төҙөй. Бында мөрәжәғәт менән килеүселәр проблема тураһында хәбәр итә, анкета тултыра һәм теге йәки был ярҙам сараһын алыу өсөн ҡайҙа мөрәжәғәт итергә кәрәклеге тураһында мәғлүмәт ала аласаҡ.
Бөгөнгө көндә Башҡортостан Республикаһында 55 ярҙам сараһы ғәмәлдә, уларҙың 12-һе бер йыл элек тормошҡа ашырыла башлаған. Был саралар ҡалабыҙҙа ла әүҙем күрһәтелә, уларҙың үтәлешен социаль координаторҙар күҙәтә, - тип билдәләне ул.
Үҙәктә диагностика һәм релаксация кабинеттары, шулай уҡ ДНК анализы өсөн стериль кабинет эшләйәсәк.
Үҙәктә музей ҙа бар. Уның экспонаттарын урындағы халыҡ, геройҙарҙың туғандары һәм яҡындары, Тарихи-тыуған яҡты өйрәнеү музейы хеҙмәткәрҙәре йыя.
«Мираҫ» учреждениеһы директоры Руслан Сафиканов һүҙҙәренсә, музейҙа тарихи әҙәбиәт, Беренсе донъя һуғышында, Бөйөк Ватан һуғышында, локаль конфликттарҙа ҡатнашҡан яҡташтарыбыҙ яҙмышы тураһында һөйләүсе экспонаттар, шулай уҡ альбомдар, амулеттар, флагтар, шеврондар, ҡулланылған пилотһыҙ осоу аппараттары, ҡорал һәм башҡа бик күп нимәләр ҡуйылған.
Салауат индустриаль колледжының вокал студияһы артистарының сығышы ижади бүләк булды. Йәштәр «Рәсәй - ул беҙ» йырын башҡарҙы.