Уңайлы булһа йәшәгән урының

Салауатта быйыл “Башҡорт ихаталары” программаһы сиктәрендә ике ихата һәм “Уңайлы ҡала мөхитен булдырыу” программаһы ярҙамында Батыр аллеяһы төҙөкләндерелә.

САЛАУАТ “БАШҠОРТ ИХАТАЛАРЫ”
Һүҙ Бекетов урамындағы 10-сы, 12-се һәм 14-се йорттар, Калинин урамындағы 18-се, 20-се, 22-се, 24-се, 26-сы йорттар һәм Ленин урамындағы 64-се йорт алдары тураһында бара. Бекетов урамындағы ихата
биләмәһен комплекслы төҙөкләндереүгә 25 690 014,05 һум йүнәлтелгән, Калинин һәм Ленин урамындағы йорт алдарын 45 850 527,86 һумға тәртипкә килтерәләр. Күптән түгел был биләмәләргә ҡала хужалығы идаралығы белгесе Юлиә Байғужина сыҡты.
Бекетов урамындағы ихатала эштәр 99 процентҡа тамамланған. Төрлө йәштәге балалар өсөн майҙансыҡтар, автомобилдәр өсөн парковка барлыҡҡа килгән, күп ағастар һәм ҡыуаҡлыҡтар ултыртылған. Сағыу һәм матур балалар майҙансығын эшләгәндә үҙенсәлекле резина япмаға өҫтөнлөк биргәндәр.
- Балалар майҙансығын сағыу резина япмаһы менән төрлөләндерергә ҡарар иттек. Эште Мәләүез проектлаусыһы башҡарҙы. Япма хәүефһеҙ, оҙаҡ хеҙмәт итеүсән, һалҡындан да, эҫенән дә ҡурҡмай, - ти белгес.
Бөтә периметр буйынса гортензиялар, сағандар, спиреялар, туялар, йәсминдәр ултыртылған.
- Бекетов урамындағы проект тулыһынса тамамланған тиерлек. Ярай әле һауа шарттары матур булды, ямғырҙарға тиклем өлгөрҙөк. Калинин урамындағы ихатала бордюр эшләнде, таяуҙарҙы тоҡандырҙыҡ - ут
бар. Материалдар алынған, эштәр дауам итә,- тине Юлиә Байғужина.
2025 йылда “Башҡорт ихаталары” программаһында ҡатнашыуға Салауат ҡалаһы ике ғариза биргән. 

Ә БАТЫР АЛЛЕЯҺЫНДА...
Батыр аллеяһының икенсе өлөшөндәге эштәр “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проекты сиктәрендә башҡарыла. Тик туҡтауһыҙ яуған ямғырҙар эште
тотҡарлаған. Әммә белгестәр кәйефен төшөрмәй, эштәрҙе мөмкин тиклем тиҙерәк тамамлау өсөн бөтә ысулдарҙы эҙләй.
- Кешеләр аңламай, эштәрҙең оҙаҡҡа һуҙылыуына зарлана. Беҙ кесе архитектура формаларын, брусчаткалар, махсус ултырғыстар менән  шахмат өҫтәлдәре, яҡтыртыу бағаналары алдыҡ. Быларҙың барыһын да урынлаштырырға ҡала, - ти ул.
Батыр аллеяһында сәскәләр композицияһы барлыҡҡа киләсәк, биләмә йәшелләндереләсәк, парк мебеле, декоратив перголдар ҡуйыу һәм хатта сиренеариум булдырыу планлаштырылған. Һәр ваҡыттағыса, эскәмйәләр, сүп-сар һауыттары, яҡтыртҡыстар ҡуйыла. Ағас күләгәһендә өҫтәл уйындары өсөн зона булдырыла.
Аллеяла һаҡ та ҡуйыласаҡ. Салауат ҡалаһы башҡорттары ҡоролтайы комитеты инициативаһы менән (рәйесе Азат Юлтимеров), милли батырыбыҙ Салауат Юлаевтың бюсы күп йыллыҡ сәскәләр һәм ҡыуаҡлыҡтар менән
биҙәләсәк, ә вандалдарҙан һаҡлау өсөн матур сылбыр менән уратыласаҡ.
- Аллеяның беренсе өлөшө йәнлерәк булһа, икенсе өлөшө тыныс мөхиттә ял итеү өсөн ҡулайлы, - ти белгес.
Салауаттар “Уңайлы ҡала мөхитен булдырыу” программаһы сиктәрендә 2025 йылда төҙөкләндереләсәк биләмә өсөн үҙ тауышын биргән.
- Тауыш биреү һөҙөмтәләре буйынса Космонавтар бульварындағы биләмә (Еңеүҙең 30 йыллығы урамынан Островский урамына тиклем) еңеп сыҡты. Эштәргә киләһе йыл тотонабыҙ. Был участкала авария хәлендәге ағастар күп, бер өлөшө һынып бөткән, уларҙы беренсе сиратта аласаҡбыҙ. Ә ҡалған сәләмәт ҡыуаҡлыҡтарҙың һәм ағастарҙың төп өлөшөн һаҡлап алып ҡалырға тырышасаҡбыҙ, - тип хәбәр итте Юлиә Байғужина.

Алена БИЗИКИНА фотолары.