“Рәхмәт - 2024”

6, 7 һәм 8 сентябрҙә Башҡортостан Башлығын һайлау көндәрендә, үҙ һайлау участкаларына килгән кешеләрҙең барыһының да «Рәхмәт-2024» республика акцияһы сиктәрендә бүләктәр уйнатыуҙа ҡатнашыу өсөн OR-билеттар алыу мөмкинлеге бар. 

Был юлы ҡатнашыусылар 330-ҙан ашыу ҡиммәтле приздар: квадроциклдар, мотоцикл, һыу мотоциклы, велосипедтар, электр самокаттары, телевизорҙар, ноутбуктар, планшеттар, телефондар һәм робот саң һурҙырғыстар ота ала. Ғаиләнең һәр ағзаһына, шул иҫәптән балаларға ла QR-билет бирелә. Билеттағы 8 символдан торған кодты рахмат102.рф сайтында теркәргә кәрәк.

Бүләктәр көнөнә ике тапҡыр уйнатыла. 6 сентябрҙә көндөҙгө сәғәт 2-лә һәм киске сәғәт 8-ҙә, 7 сентябрҙә көндөҙгө 2-лә һәм киске сәғәт 8-ҙә, 8 сентябрҙә көндөҙгө сәғәт 2-лә. Йәкшәмбе, 8 сентябрҙә, тәүгә «Бүләктәр төнө» ойошторола, унда бер юлы 130-ҙан ашыу бүләк уйнатыла.

Приз алыуға хоҡуғығыҙҙы юғалтмаҫ өсөн OR-билеттарҙы 30 сентябргә тиклем һаҡларға кәрәк буласаҡ. 

13 сентябрҙә барлыҡ теркәлгән билеттар Башҡортостан юлдаш телевидениеһының тура эфирында «Ҙур Рәхмәт» суперприздар уйнатыуҙа ҡатнаша. Бүләктәр араһында машиналар, тотош ғаилә менән Сочиға сәйәхәт, Башҡортостан шифаханаларына һәм ял йорттарына юлламалар бар. Исемлеккә Өфөләге өс фатир ҙа ингән.

Иҫегеҙгә төшөрәбеҙ, яҙын акцияла ҡатнашып, беҙҙең ҡаланан Ксения Ғималетдинова Сочиға путевка отҡайны.