19 апрелдә юлсылар Монтажсылар бульварында һәм Нефтселәр проспектында юлдағы соҡорҙарҙы ямай башланы.
– Тәү сиратта тығыҙ юлдарҙағы соҡорҙарҙы ямау өсөн ремонт эштәре һалҡын асфальт менән башҡарыла. Уны минус 30 градустан плюс 40 градус һауа температураһына тиклем һалырға мөмкин. Соҡорҙарҙы алдан эшкәртәләр: «дөрөҫ» формаға тиклем ҡырҡып алалар, горелка менән йылыталар, һуңынан уға асфальт-бетон ҡатнашмаһын тултыралар һәм виброплит менән тығыҙлап сығалар. Уңайлы һауа шарттары етеү менән деформацияларҙы бөтөрөү буйынса ҡайнар асфальт-бетон ҡатнашмалары менән эште дауам итәсәкбеҙ, – тип аңлатты юл хужалығы бүлеге начальнигы Антон Яковлев.
2022 йылда дөйөм майҙаны 4430 метрлыҡ автомобиль юлдарын ремонтлау күҙаллана. Төҙөүселәр, Карл Маркс, Зәки Вәлиди урамдары, Нефтселәр проспекты асфальт түшәүгә әҙер.
Антон Яковлев һүҙҙәренсә, эштәрҙең төп өлөшөн 15 июнгә тиклем тамамлау күҙаллана. Ә бына юл япмаһын мониторинглау был датанан һуң да дауам итәсәк. Авария хәлендәге соҡорҙарҙы асыҡлаған осраҡта хеҙмәткәрҙәр уларҙы бөтөрөү менән шөғөлләнәсәк.
Эльвира Рәхимова һәм Гөлнара Асҡарова фотолары.