Стәрлетамаҡта Ижади индустрияларҙы үҫтереү буйынса советтың күсмә ултырышы

Башҡортостан Башлығы йыйылыусыларҙы быйыл 8 августа тәүге тапҡыр билдәләнгән ижади индустриялар көнө менән ҡотланы. Төбәк етәксеһе республикала ижади берләшмәгә ярҙам инфраструктураһын булдырыуҙың төп этаптары хаҡында ла һөйләне.

- Бөгөн беҙ Советтың икенсе ултырышын үткәрәбеҙ. Уның бурысы – креатив индустриялар өлкәһендәге эштең төп йүнәлештәрен билдәләү. Тәүге осрашыуҙан алып беҙ, беренсенән, «Башҡортостан Республикаһында креатив индустрияларҙы үҫтереү тураһында» закон, шулай уҡ иҡтисадтың был өлкәһен көйләүсе норматив-хоҡуҡи акттар ҡабул иттек. Бындай проекттарға ярҙам итеү системаһын булдырабыҙ - стратегик эшләнмәләр үҙәге ҡарамағындағы креатив индустрияларҙы үҫтереү дирекцияһы, продюсерҙар клубы эшләй башланы. Инвесторҙар мәсьәләләрен оператив хәл итеү һәм уларға ярҙам сараларын ҡабул итеү өсөн даими рәүештә «Ижади индустриялар сәғәте» үткәрәбеҙ, - тине Радиф Хәбиров.

Ултырыштың көн тәртибенең төп темаһы булып ижади иҡтисадты үҫтереүҙә йәштәрҙең ролен арттырыу һәм уның ҡатнашлығында заманса ҡала мөхитен булдырыу тора. Был хаҡта Рәсәйҙең халыҡ артисы, Дон дәүләт техник университетының Креатив индустриялар институты директоры Анита Цой ентекләберәк һөйләне. Ул мәктәп уҡыусыларын һәм студенттарҙы был өлкәлә яңы проекттарҙы әҙерләүгә һәм идара итеүгә йәлеп итеү кәрәклеген билдәләне. Һүҙ тәү сиратта уҡыу йорттары һәм ижади киңлектәр араһындағы кооперация тураһында бара, шул иҫәптән акселерация программалары нигеҙендә.

«Креатив иҡтисад» автономилы коммерцияға ҡарамаған ойошма директоры Алексей Евсеев үҙ сығышында халыҡтың йәшәү сифатын күтәреү маҡсатында ҡала мөхитен яңыртыуға ла иғтибар бирҙе. Ул ижади секторҙың ҡаланың мөһим нигеҙҙәренең береһенә әйләнеүен һөйләне. Төбәктәрҙең бурысы - был трендты мөмкин тиклем файҙаланыу һәм креатив иҡтисад менән идара итеү вертикален төҙөү. Бындай ҡараш нигеҙендә Башҡортостан заманса йәмәғәт киңлектәрен формалаштырыу буйынса илдә алдынғы позицияларҙы биләй ала.

Рәсәй урбанисы һәм территорияларҙы комплекслы үҫтереү буйынса эксперт, Рыбаков исемендәге глобаль университетының һәм Мәскәү физика-техник институтының «Киләсәк ҡалаһы» ғилми-белем биреү үҙәгенең академик етәксеһе Святослав Мурунов, хәҙерге иҡтисад креатив продукттарға заказ биреүсе булырға тейеш, тип билдәләне. Ошоноң менән бәйле ул ведомство-ара үҙ-ара эш итеүҙе әүҙем үҫтерергә һәм тармаҡтарҙың кооперацион бәйләнештәрен нығытырға тәҡдим итте.

Теманы дауам итеп, «Сысерти үҫеш агентлығы» ойошма директоры Ян Кожан Башҡортостандың Креатив индустрияларҙы үҫтереү буйынса совет ултырышында бәләкәй территорияларҙы үҫтереү ҡоралы булараҡ «ҡала продюсеры» моделен тәҡдим итте. Был ҡараш ҡала мөхитен үҙгәртеүгә ижади һәм эшлекле халыҡты йәлеп итеүгә нигеҙләнгән. Башҡортостан Башлығы был идеяны хупланы һәм республика муниципалитеттарында талантлы кешеләрҙең күп булыуын һыҙыҡ өҫтөнә алды.

Стәрлетамаҡта ижади индустрияларҙың үҫеше тураһында ҡала хакимиәте башлығы Эмиль Шәймәрҙәнов һөйләне. Ул «Сауҙагәр 2.0» ҡунаҡсыллыҡ фестивале – перспективалы художестволы ниәт һәм креатив иҡтисад идеяларына яҡын символикалы ваҡиға, тип билдәләне. Ҡалала тарихи үҙәкте реновациялау, туристик-рекреацион биләмә булдырыу һәм автор музейҙарын үҫтереү буйынса проекттар әүҙем тормошҡа ашырыла, был туристар ағымының артыуына һәм инвестициялар йәлеп итеүгә килтерә.

Бөрө районы хакимиәте башлығы Павел Трапезников Бөрө ҡалаһының мастер-планын әҙерләү һәм креатив-туристик кластер булдырыу пландары хаҡында һөйләне. Ул ҡаланың республиканың ижади индустрияларҙы үҫтереү буйынса пилот проекттарының береһе булыуын хәбәр итте.

- Халыҡ һәм бизнес мастер-планды тормошҡа ашырыуҙа ҡатнашырға һәм ҡала үҫешенә өлөш индерергә әҙер булыуын белдерҙе, – тип билдәләне Павел Трапезников. Мәҫәлән, һуңғы биш йылда ҡалала туризм һәм креатив индустрия өлкәһендә 50-нән ашыу проект тормошҡа ашырылған.

 «Башҡортостан ҡалаларын үҫтереү институты» ойошмаһы директоры Ольга Сарапулова республиканың йәмәғәт киңлектәрендәге үҙгәрештәр хаҡында һөйләне.

– Төп бурысыбыҙ - биләмәләрҙе төҙөкләндереү аша иҡтисадтың үҫешенә һәм халыҡтың үҙ-үҙен тормошҡа ашырыу өсөн мөмкинлектәр булдырыуға килтереү. Ҡала мөхите социомәҙәни үҙгәрештәр өсөн драйвер булып киткән кейстар бар. Бөрө – был күренештең иҫ киткес өлгөһө, - тине Ольга Сарапулова.

Ижади индустрияларға арналған телевизион проекттың башланыуы тураһында «Башҡортостан» телерадиокомпанияһының генераль директоры Рөстәм Зәрәфетдинов хәбәр итте. «Креатив код» программаһының тәүге сығарылышы 9 августа Башҡортостан юлдаш телеканалында сығасаҡ, тип билдәләне ул. Республика Башлығы ҡушыуы буйынса ойошторолған тапшырыу ижади берләшмәнең башланғыстарын алға ебәреүгә булышлыҡ итәсәк. Радий Хәбиров республикала ижади индустрияларҙы популярлаштырыу менән комплекслы шөғөлләнеүҙәрен һыҙыҡ өҫтөнә алды.

- Беҙ маркетинг функцияһын үҙ өҫтөбөҙгә алдыҡ. Был Башҡортостан юлдаш телевидениеһы ғына түгел – киң мәғлүмәт сараларының бөтә линейкаһын һәм заманса һанлы платформаларҙы йәлеп итәбеҙ, - тине төбәк етәксеһе.

Совет ултырышында шулай уҡ Рәсәй продюсеры Сергей Кальварский сығыш яһаны. Ул республиканың идара итеү командаһы яғынан креатив индустрияларға иғтибарҙың мөһимлеген билдәләне һәм төбәктә кино берләшмәһе менән системалы эшләү һәм федераль проекттарҙы йәлеп итеү өсөн махсуслаштырылған комиссия булдырырға тәҡдим итте.

Радий Хәбиров тармаҡҡа ярҙам саралары хаҡында иҫкә төшөрҙө. Мәҫәлән, Башҡортостанда йыл һайын кинематографияны үҫтереүгә дөйөм суммаһы 50 миллион һумлыҡ гранттар бүленә.

 Ултырыш аҙағында төбәк етәксеһе, советҡа ағзалыҡ иҡтисадтың ижади секторын әүҙем үҫтереүҙе күҙ уңында тота, тип билдәләне. Унда ҡатнашыусылар, асылда, республикала ижади индустрияларҙың амбассадоры булырға тейеш. Был маҡсатҡа тармаҡтағы ҡаҙаныштар өсөн йыл һайын премиялар тапшырыу тантанаһы булышлыҡ итәсәк. Тәүге тапҡыр сараны 2025 йыл аҙағында үткәреү планлаштырыла.

https://glavarb.ru/ru/news/event/radiy-habirov-provyol-v-sterlitamake-vyezdnoe-zasedanie-soveta-po-razvitiyu-kreativnyh-industriy-81034/