Салауаттың «Әннәби» йәмиғ мәсете биләмәһендә мөһим ҡоролма барлыҡҡа килде

«Һәр мосолмандың бурысы - тирә-яҡтағы донъяны таҙараҡ, яҡшыраҡ һәм матурыраҡ итеү. Шуға күрә һәм ҡала халҡы һәм ҡунаҡтары ислам диненең ни тиклем матур булыуын күрһен өсөн, беҙ мәсет тирәһендәге биләмәне төҙөкләндерергә тырышабыҙ», - тип уртаҡлаша шәйех, мөфтөй, Юғары мөфтөй, Рәсәй мосолмандары үҙәк диниә назараты рәйесе ярҙамсыһы Рәмил хәҙрәт Насиров.

Һәр яҙҙы мәсет етәксеһе Рәмил хәҙрәт комплекс хеҙмәткәрҙәре менән бергә күп һанлы сәскә композицияларын ултыртыуҙан башлай. Әммә культуралар үҫтереүгә лә, сәскәләр үҫтереүгә лә күп көс, энергия һәм, әлбиттә, һыу сарыф итергә кәрәк - бер генә сәскә лә, бер генә бөжәк тә, бер генә тере йән эйәһе лә һыуһыҙ йәшәй алмай.

«Беҙ барыбыҙ ҙа Африкала һәм планетабыҙҙың башҡа ҡоро урындарында кешеләрҙең нисек йәшәүен беләбеҙ, шул уҡ ваҡытта Аллаһы Тәғәлә беҙгә бөтә яҡшылыҡтарҙы, шул иҫәптән беҙ тәбиғәт байлыҡтарын тәғәйенләнеше буйынса файҙалана һәм нимәгәлер мохтаж булғандарға ярҙам итә алһын өсөн, таҙа эсәр һыуҙы биргән. Әгәр кешеләрҙең ҡалала сәскә түтәлдәренә нимә һибеүен ҡараһаҡ, йыш ҡына был кран аҫтынан эсәр һыу икәнен күрәбеҙ, ә шәриғәт буйынса бындай һыуҙы хужалыҡ-көнкүреш ихтыяждары өсөн ҡулланыу исраф булып тора, йәғни берәй нәмәне кәрәкмәгән күләмдә ҡулланыу, ә был мохтаждарға файҙаға була алыр ине», - тип аңлата Рәмил хәҙрәт.

Тап шуға күрә 2024 йылда йәмиғ мәсете комплексы территорияһында эсергә яраҡһыҙ, икенсе төрлө әйткәндә, техник һыу ҡатламын асыусы тәрән булмаған скважина быраулана. Ә 2025 йылдың ғинуарында скважина тирәһендәге территория битараф булмаған кешеләр ярҙамы менән төҙөкләндерелә. Скважина тирәләй тирмә төҙөлә, уның өҫтөнә ярым ай ҡуйыла һәм ул мәсеттең дөйөм картинаһына тап килә.

Фото «Әннәби» йәмиғ мәсетенән.