Холҡоң ниндәй?

“Үәт, ир-ҡатын” йә “ҡыҙҙар кеүек йомшаҡ егет” тигәнерәк һүҙҙәрҙе күп ишетергә тура килә. Түбәндәге һынамыш ярҙамында үҙегеҙҙе һынағыҙ әле – холҡоғоҙ енесегеҙгә тура киләме? Һорауҙарға “эйе”, “юҡ”, “белмәйем” тип яуап бирергә кәрәк.
1. Форсаты тура килһә, мотлаҡ иғтибар үҙәгенә эләгергә яратам.
2. Ауыр йәки бәхәсле мәлдә иң яҡын кешемдән ярҙам көтәм.
3. Һәр эште үҙем еңел генә хәл итә алам.
4. Үтә киң күңеллемен, кешеләр­ҙе йәлләп барам.
5. Абруйымды, һүҙемде яҡлай беләм.
6. Тәүге урында – тышҡы ҡиәфәтем! Үҙемде тәрбиәләү ҙур ҡәнәғәтлек тойғоһо бирә.
7. Ғәҙәттә, тирә-яҡтағыларға, ваҡиғаларға яраҡлашырға тырышам. Башыма килгән тәүге уй артынан йүгермәйем.
8. Ҡаршы енес вәкиле менән шаярырға, флирт ҡорорға яратам.
9. Мин көслө рухлы һәм үҙ аллы кешемен.
10. Һәр саҡ кеҫәмдә көҙгө йөрөтәм.
11. Үпкәмде оҙаҡ онотмайым, үс алырға яратам.
12. Мин сабырһыҙ кеше. Һалҡын ҡанлылыҡ һаҡлай белмәйем.
13. Мөхәббәт – ул йәшерен тойғо, уның тураһында мотлаҡ башҡалар­ға һөйләргә тимәгән, тип уйлайым.
14. Мин – романтик.
15. Холҡом атайымдыҡына оҡшаған.
Һәр таҡ һандағы һорауҙың (йәғни 1, 3, 5, 7, 9, 11, 13, 15 пункттары) “эйе” һәм йоп һандағы һорауҙың “юҡ” яуабы өсөн иҫәбегеҙгә 10 мәрәй яҙығыҙ. Һәр “белмәйем”гә – 5 мәрәй.
100 – 150 мәрәй. Психологик яҡтан һеҙ – йөҙ процент ир кеше. Тәүәккәллек, үҙаллылыҡ, азат булыуығыҙ – был һеҙҙең көслө сифаттарығыҙ. Тормошҡа ҡарашығыҙ күптәрҙә һоҡланыу уята. Был донъяла ни өсөн йәшәгәнегеҙҙе беләһегеҙ, башҡаларға ныҡлы терәкһегеҙ. Ҡатын-ҡыҙ булһағыҙ, үҙегеҙгә, тормошом менән ҡәнәғәтменме, тигән һорау­ҙы биреп ҡарағыҙ.
50 – 99 мәрәй. Һеҙҙә көслө заттың да, ҡатын-ҡыҙҙарҙың да типик һыҙаттары бар. Шарттарға яраҡлаша беләһегеҙ. Аҡыл һәм тойғо, йомшаҡлыҡ һәм тәүәккәллек араһында алтын урталыҡ тапҡан­һығыҙ. Тормош һеҙҙән көслө йә хисле булыуҙы талап иткәндә психологик һығылмалылығығыҙ иң яҡшы дуҫығыҙ буласаҡ.
0 – 49 мәрәй. Психологик яҡтан һеҙ – йөҙ процентҡа ҡатын-ҡыҙ. Бөгөн кешеләрҙең бындай тибы һирәк осрай. Әгәр ҙә йорт эштәре менән булышырға, аш-һыу әҙерләргә, балалар тәрбиәләргә ярат­һағыҙ һәм тыныс, йомшаҡ, буйһоноусан холоҡло булһағыҙ – һеҙ ир-егеттәрҙең хыялы. Әгәр ҙә һеҙ көслө зат вәкиленән икән, тимәк, йәлләргә генә ҡала...