газета "Салауат"
+26 °С
Болотло
Бөтә яңылыҡтар
Ял сәғәтендә
13 Июль 2018, 11:31

Китаплы ғаилә - бәхетле ғаилә

«Бер ниндәй ҙә китап уҡымай, уҡырға ла теләмәй»,- тип күп кенә ата-әсәләр зарлана. Сөнки йәш быуын китап уҡыуҙы компьютер, телевизор, смартфонға текләнеп ултырыуға алмаштырған. Был - насар ғәҙәт. Беҙҙең заманда балалар уҡыуға айырыуса мохтаж. Шуның өсөн ата-әсә баланың китапҡа ҡарата һөйөү тойғоһон ғаиләнән башларға тейеш. Ғаиләлә бергә уҡыу йолаһы - ғаилә тәрбиәһенең бик мөһим өлөшө.

Ата-әсәләр балаларға китап уҡы-ғанда уларҙың ни тиклем ҡыуаныуын бөтәһе лә аңлап бөтмәй. Ике йәшкә тиклем көнөнә бер-нисә минут, ике йәштән һуң -15-20 минут уҡырға кәрәк. Әҫәрҙең ниндәй булыуы түгел, ә уны атай йәки әсәй, олатай йәки өләсәй, ағай йәки апайҙың уҡыуы мөһим. Яҡын кешенең тауышы, китаптар һәм шәхси аралашыу йылылыҡ һәм берҙәмлек мөхитен булдыра. Уҡыу барышында бала әҫәрҙең структураһын, сюжетын үҙләштерә. Ҡыҫҡаса әйткәндә, уның логик фекерләүе үҫешә. Балаға бәләкәйҙән уҡыу тормошҡа әҙерлектең тәүге этабы тип һанала. Әлбиттә, балаға китап һайлағанда йәшенә тура килгәнен алыу дөрөҫ, сөнки һәр йәшкә тап килгән әҙәбиәт бар. Ике йәштән бишкә тиклем шиғырҙар, һынағыстар, фольклор, алты йәштән һигеҙ йәшкә тиклем ҡыҙыҡлы геройҙар менән ҙурыраҡ әҫәрҙәр һайлау зарур. Туғыҙ йәштән ун өс йәшкә тиклем балалар тарих, яҙыусылар, тарихи шәхестәрҙең тормошо, эшмәкәрлеге менән ҡыҙыҡһына, әхлаҡи мәсьәләләргә, дуҫлыҡ, мәхәббәт, бәхет тураһында фекерләүҙәр барлыҡҡа килә. 14 йәштән 18 йәшкә тиклем егеттәрҙең, ҡыҙҙарҙың да яратҡан темалары асыҡлана.

Ни өсөн ололарға ла, балаларға ла китап уҡыу файҙалы? Китап уҡыу һүҙлек запасын һәм грамоталылыҡты арттыра, телмәрҙе байыта, хәтерҙе, фекерләүҙе үҫтерә, уйлап табыу ҡеүәһен арттыра.

Китап - ул хазина. Ошо хазинаны һаҡлайыҡ, уның менән дуҫ булайыҡ. Ғаилә менән китап уҡыу йолаларын ғаилә тәрбиәһе итеп алайыҡ!


Читайте нас: