Студентмын ғына тимәйҙәр

Артур Алекбәров менән Илдар Хәйбуллин III курсты тамамлай, ә Гүзәлиә Мөхәмәтйәрова икенсе курста белем ала. Уҡытыу-тәрбиә эштәре буйынса директор урынбаҫары Эльвира Рәхмәтуллина әйтеүенсә, был студенттар - колледждың йөҙөк ҡашы. Һәр ваҡыт алдынғы рәттәләр, барлыҡ үткәрелгән сараларҙа әүҙем ҡатнашалар.
- Иҫ киткес тырыш студенттар. Уҡыу йортона белем алыу өсөн генә түгел, ә үҙҙәрен бар яҡлап та үҫтереү, камиллаштырыу өсөн килеүҙәре күренеп тора. Артур - республика башлығы стипендиаты, студенттар советы рәйесе. Былтыр Мәскәүҙә үткән «Абилимпикс» халыҡ-ара һөнәри оҫталыҡ чемпионатында ике егетебеҙ 1-се урынға лайыҡ булды, шуларҙың береһе - Артур. Гүзәлиә - һандуғасыбыҙ, тауышы бик матур, шулай уҡ тик яҡшы билдәләргә өлгәшә. Илдарға студенттар профкомы рәйесе вазифаһы йөкмәтелгән. Бурыстарын уңышлы атҡара, - тип һәр береһенә айырым туҡталып үтте уҡытыусылары.
Бынан тыш, йәштәр «Бергә» республика хәрәкәтенең «Тормош линияһы» төбәк бүлексәһе ирекмәндәре лә.
- Төрлө акцияларҙа ҡатнашабыҙ. Мөмкинлектәре сик-ләнгән студенттар һәм мәктәп уҡыусылары бергә йыйылып аралашһын, яңы дуҫтар тапһын өсөн, «Бергә беҙ еңәсәкбеҙ» тип аталған сара уҙғарҙыҡ. Колледждағы «Мәрхәмәтлек дәүере» тип аталған акция ла традицияға ингән. Студенттар йәрминкә ойоштора ла, йыйылған аҡсаларҙы ошондай саралар уҙғарыуға йүнәлтә. Волонтерҙар мәктәптәренә барып, курстар тамамлайбыҙ. Ғәҙәттә ул Өфөлә үтә. Унда ҡыҙыҡлы кешеләр менән танышып, яңы белем алып ҡайтабыҙ. Тормош тәжрибәһе бай булған апай-ағайҙар уны беҙгә бик күп нәмә өйрәтә. Бәләкәй генә изгелек эшләү ҙә күңелгә рәхәтлек тойғоһо бирә, эскерһеҙ ярҙам итеү оло шатлыҡ килтерә. Арабыҙҙа сит кеше ҡайғыһына битараф булмаған иптәштәребеҙҙең күп булыуы ҡыуандыра. «Йәш гвардия», «Ҡала көсө» ойошмалары менән тығыҙ хеҙмәттәшлек итәбеҙ. Был йәһәттән етәксебеҙҙән бик уңдыҡ. Айгөл Шамил ҡыҙы Низаметдинова беҙҙе изге эштәргә әйҙәй, бик оҫта ойоштороусы, иҫ киткес педагог, - тип ҡәнәғәтлек менән һөйләйҙәр күңелле студент тормошо тураһында йәштәр.
- Көндәлек лекциялар, сессиялар, имтихандар... Уҡыуҙан тыш йәмәғәт эштәре менән шөғөлләнеүгә ваҡытығыҙ етәме? - тип һорайым.
- Дәрестәр тамамланғандан һуң да әллә күпме эштәр башҡарып була. Әгәр көсөң, дәрт-дарманың бар икән, ниңә уны мәғәнәһеҙ шөғөлдәргә йүнәлтергә? Ә былай, үҙең дә шат, башҡалар ҙа ҡәнәғәт, - тип яуаплай улар.

Динә ҒӘЛИЕВА