Аллея матурайған

- Батыр аллеяһында йөрөгән һайын, Салауатыбыҙ өсөн шатланабыҙ, аллеяны төҙөкләндереү менән ҡаланың был өлөшө сәскә атты. Һәр кем килеп бында рәхәтләнеп ял итеп ҡайта. Хәҙер ҡала халҡы Космонавтар бульварындағы биләмәне төҙөкләндереү өсөн тауыш бирҙе, - тип үҙ фекерен белдерҙе Башҡортостан Республикаһы Башлығы Радий Хәбиров менән һөйләшеү барышында ҡалала йәшәүсе Роза Азанова. Космонавтар бульварында аллеяны төҙөкләндереү менән бер рәттән, үҙәк биҫтәне лә «Башҡорт ихаталары» программаһына индереү бик отошло булыр һәм бындай эш был биҫтәлә йәшәүселәр өсөн ысын бүләк булыр ине, тип өҫтәне.

Һөйләшеү Батыр аллеяһында төбәк башлығының беҙҙең ҡалаға эш сәфәре барышында барҙы. Ҡала хакимиәте башлығы Альберт Моталов оҙатыуында Радий Хәбиров яңыртылған йәмәғәт урынын ҡараны һәм ҡала халҡы менән аралашты.

- Беҙ үҙебеҙ ҡаланың иҫке өлөшөндә йәшәйбеҙ, әммә Батыр аллеяһында йыш булабыҙ. Бында бигерәк тә кисен матур. Һеҙгә, Радий Фәрит улы, ошондай матурлыҡ өсөн ҙур рәхмәт, - тип рәхмәт белдерҙе Вәлимә Төгөлбаева һәм Нәжибә Әхмәтйәнова. - Ҡаланың иҫке өлөшөн дә төҙөкләндереләсәк биләмәләр исемлегенә индерергә тәҡдим итергә теләйбеҙ, ул яҡта йәшәгән салауаттар ҙа матурлыҡ күреп, рәхәтләнеп йөрөр ине.

Радий Хәбиров аллеяны реконструкциялауҙы ыңғай баһаланы, шул уҡ ваҡытта ҡаланың тағы ла бер мөһим еңеүен билдәләне. Тиҙҙән төҙөкләндерелә башлаясаҡ Ленин исемендәге майҙанды һәм уның эргәһендәге биләмәне телгә алды.

- Салауаттар - уңайлы ҡала мөхитен булдырыуҙың иң яҡшы проекттары бөтә Рәсәй конкурсында еңеүселәр, - тип маҡтаны Радий Хәбиров һәм ҡала хакимиәтенең яңы башлығына уңыштар теләне. - Теләк булғанда барыһы ла килеп сығырға тейеш.
Гөлиә Нуриманова.
Автор фотоһы.