Ҡаһарманлыҡ онотолмай

“Белоруссияны немец-фашист илбаҫарҙарынан азат итеүҙең 75 йыллығы” юбилей миҙалы Белорусь Республикаһы Президенты указы менән махсус юбилейлы датаға ҡарата булдырылған һәм был иҫтәлекле награда Белоруссия халҡы менән бер рәттән, күрше дәүләт ерҙәрен азат итеүҙә ҡатнашҡан сит ил граждандарына ла тапшырыла. Улар араһында Салауатта йәшәүселәр ҙә бар.
Антонина Горелкина һуғышҡа 1943 йылда, 18 йәше лә тулып өлгөрмәй китә. Ул зенит артиллерияһында төҙәүсе булып хеҙмәт итә. Хәҙер инде уға 96 йәш. Антонина Николаевна ғүмер буйына ҡаланың хәрби комиссариатында беренсе бүлек начальнигы ярҙамсыһы булып эшләй. Ире хәрби кеше була. Хаҡлы ялға сыҡҡас, ҡаланың ветерандар советы эшмәкәрлегендә актив ҡатнаша. Балалары булмаһа ла, туғанының ҡыҙы уны бөгөн оло ихтирам менән ҡарай.