“Әсәй, Рәсәйгә хеҙмәт итәм!” проекты

Салауат ҡалаһында йылдың-йылы Рәсәй армияһы сафына саҡырылыусылар һаны кәмей. Был проекттың маҡсаты булып тап ошо мәсьәләне хәл итеү, Рәсәй Федерацияһы Хәрби Көстәренә йәштәрҙе йәлеп итеү, шулай уҡ үҫеп килеүсе быуында патриотик тәрбиә кимәлен күтәреү тора, тип хәбәр итә “Йәшлек” йәштәр башланғыстарына булышлыҡ итеү һәм үҫтереү фондының матбуғат секретары Карина Ишембәтова. Ҡала биләмәһе буйынса хәрби бурысын үтәүгә яңы алыныусы егеттәрҙең фотоһы менән баннерҙар эленгән. Был хәрби һәм сәйәси әҙерлек отличниктары булған ябай Салауат егеттәре. Улар төшкән баннерҙарҙа “Ысын ир-егет үҙе, ғаиләһе һәм Тыуған иле өсөн яуап бирә!”, “Үҙ-үҙемә ышанам, киләсәкте уйлайым, Рәсәйгә хеҙмәт итәм!”, “Армия технологик прогресс йүнәлешендә! Заманса бул!” кеүек рухлы, илһөйәрлек тойғоһон тыуҙырыусы һүҙҙәр яҙылған.
- Беҙ был проект йыл да Хәрби Көстәр сафтарына саҡырыу алдынан тормошҡа ашырылыр, тип ышанабыҙ. Баннерҙарҙа армияға барыуҙан ҡасмай, Ватанға намыҫ менән хеҙмәт итеүсе егеттәр төшөрөләсәк. Проектты Башҡортостандың башҡа ҡалаларында ла уҙғарыу планлаштырыла, - ти фондтың матбуғат секретары Карина Ишембәтова.