Әҙ бәпәйләйҙәр республикала, әҙ...

Ғинуар-мартта төбәктә 10446 сабый тыуған (2018 йылдың беренсе кварталына ҡарағанда 1145-кә аҙыраҡ). Туғыҙ районда ғына тыуым буйынса ыңғай динамика күҙәтелә.

Үлем сәбәптәре элеккесә ҡала. Йөрәк-ҡан тамырҙары сирҙәренән яҡты донъянан китеү осраҡтары 16 процентҡа артҡан, онкология сирҙәренән вафат булыусылар 3 процентҡа кәмегән. Архангел, Әлшәй, Стәрлебаш райондары яман шеш менән сирләү буйынса алда килә: 1000 кешегә 279, 334, 366 кеше. Учалы, Йылайыр, Көйөргәҙе райондарында 1000 кешегә 800-ҙән ашыу кеше, Ауырғазыла һәм Ишембайҙа 1000 кешегә 900-ҙән күберәк кеше йөрәк-ҡан тамырҙары сирҙәре менән ауырыған. Ҡалаларҙа йышыраҡ инфекцияларҙан һәм яман шештән вафат булалар. Ауылдарҙа иһә тын алыу органдары, аш һеңдереү, бәүел-енес сирҙәренән һәм тышҡы сәбәптәрҙән. Шуның менән бергә юл-транспорт ваҡиғаларында үлем осраҡтары 30 процентҡа артҡан - беренсе кварталда юлдарҙа 21-гә күберәк кеше һәләк булған.

Сабыйҙарҙың үлем осраҡтары ла артҡан: уҙған йылдың ғинуар-мартында - 72 (1 йәшкәсә сабыйҙар), быйыл беренсе кварталда 76 бала яҡты донъя менән хушлашҡан.

Шулай ҙа һаулыҡ һаҡлау министрлығы, «Һаулыҡ һаҡлау» милли проектында билдәләнгән саралар планын үтәп, ошо проблемаларҙы еңеп сығырға тәҡдим итә.