Мусаларға ни өсөн мал-тыуар тотоу ярамай?

- Беҙ бик етди мәсьәләләрҙең береһен асыҡлауҙа ярҙам итеүегеҙҙе һорайбыҙ. Ҡала Советы ҡарары менән Салауаттағы ерҙе файҙаланыу һәм унда төҙөү ҡағиҙәләре раҫланды. Унда ер участкалары менән ҡулланыу зоналары билдәләнгән. Ошо ҡағиҙә буйынса, Муса ҡасабаһы, 111-се, 116-сы кварталдарҙа йәшәүселәр мал-тыуар, ҡош-ҡорт тота алмай. Был Ер Кодексын боҙоу һанала һәм ер участкаһының кадастр хаҡының 1 проценты, йәки 10 мең һумдан кәм булмаған штраф менән янай. Киң мәғлүмәт сараларында бәлки был документ баҫылып та сыҡҡандыр, әммә ябай кешегә уны аңлауы ауыр. Халыҡ араһында аңлатыу эше алып барылмай һәм кешеләр закон боҙоуҙарын белмәй ҙә. Росреестр белгестәре бындай закон боҙоусыларҙы билдәләп, штраф һала, күптәр мал тотоуҙан баш тартырға мәжбүр. Элек-электән мал аҫрап йәшәп килгән Муса ҡасабаһын нисек инде ерҙе файҙаланыуҙың тик рөхсәт ителгән төрөнә индерергә мөмкин? Кешеләргә тикшереүсе органдар тарафынан хатта ҡош-ҡорт тотҡан өсөн дә штраф һалыныуы мөмкин икәнлеге тураһында ниңә аңлатыу эше алып барылмай? Мәсьәләне хәл итеү өсөн ерҙе файҙаланыуҙың төрөн үҙгәртеп буламы? Һорау бик етди, ер участкаһын маҡсатһыҙ файҙаланған өсөн тартып алыуҙары ла ихтимал бит.