Эш сифатына баһа бирергә мөмкин. Беләһеңме?

2012 йылда уҡ Рәсәй Президенты үҙенең «май указы»нда социаль хеҙмәт күрһәтеүсе ойошмалар эше сифатын бойондороҡһоҙ баһалау системаһын булдырыу бурысын ҡуйғайны. Баһалау йәмәғәтселек менән берлектә алып барылырға һәм кешеләрҙең фекеренә нигеҙләнгән булырға тейеш. Уның һөҙөмтәләре, йәғни учреждениелар эшмәкәрлеге рейтингы халыҡ өсөн асыҡ күрһәтелеп барыуы ла мотлаҡ. Хеҙмәт сифатын бойондороҡһоҙ баһалау системаһы социаль өлкә учреждениелары эшенә йәмәғәт контроленең бер формаһы булып тора һәм уларҙың эшмәкәрлегенең сифатын күтәреү маҡсатын күҙ уңында тота.

Баҡтиһәң, халыҡ социаль тармаҡ ойошмалары, йәғни шул уҡ медицина, мәҙәниәт, мәғариф учреждениелары эшен баһалауҙа ҡатнашыу мөмкинлеге тураһында бик үк хәбарҙар ҙа түгел икән. Ә бит Владимир Путин асыҡлыҡ, йәмәғәт фекере был өлкәләрҙә үҙгәрештәргә этәргес булырға тейеш, тип белдергәйне. Уның һүҙҙәренсә, кадрҙар һәм идара итеү буйынса ҡарарҙар ҙа бойондороҡһоҙ баһалау мәғлүмәттәре нигеҙендә ҡабул ителергә тейеш. Был система ябай халыҡ фекерен белешеү, һорау алыуҙарҙан айырыла. Ул дәүләт ҡарамағында булған социаль ойошмаларҙа мотлаҡ һәм айырым критерийҙар буйынса үткәрелә. Ойошма тураһындағы мәғлүмәттең асыҡлығы, хеҙмәттәрҙең уңайлы шарттарҙа күрһәтелеүе, уларҙан һәр кемдең файҙалана алыуы, көтөү ваҡытының күпмегә һуҙылыуы, белгестәрҙең изгелекле, ихтирамлы мөнәсәбәте, тейешле компетентлығы, кешеләрҙең хеҙмәттәрҙән ҡәнәғәт булыуы-булмауы тураһындағы фекерҙәр иҫәпкә алына.

Социаль ойошмалар хеҙмәте сифатын бойондороҡһоҙ баһалау системаһын тормошҡа ашырыу менән Хеҙмәт һәм халыҡты социаль яҡлау министрлығы янындағы йәмәғәт советы шөғөлләнә. Министрлыҡтың сайтындағы «Социаль хеҙмәтләндереү» бүлегендә халыҡҡа хеҙмәт күрһәтеүсе ойошмалар рейтингы менән танышырға, шулай уҡ теге йәки был дәүләт учреждениеһы эшмәкәрлеген баһаларға мөмкин.

Флүрә, уҡытыусы:

- Төрлө учреждениеларҙың эшен баһалау ойошторолоуын бөтөнләй белмәй инем. Бер ваҡыт ҡалалағы шәхси дауаханаға йөрөргә тура килде. Унда, мәҫәлән, клиенттарға врачтар хаҡында үҙ фекереңде яҙып ҡалдырыу өсөн махсус йәшниктәр ҡуйылыуы иғтибарҙы йәлеп иткәйне. Үәт, үҙебеҙҙең ҡала поликлиникаларында ла ошондай халыҡ фекерен белеүҙең берәй әмәлен уйлап табып, улар нигеҙендә эштәрен яҡшыртыу буйынса саралар күрһәләр ине, тип уйлап ҡуйғайным. Улай тиһәң, кешеләрҙән һорашмайынса ла, Салауат поликлиникаларында хәл яҡшыларҙан түгеллеге көн кеүек асыҡ, был турала етәкселәр ҙә белә. Тик яҡшы яҡҡа үҙгәреш кенә бик һиҙелмәй.

Хәлил Ямалетдинов, водитель:

- Күп функциялы үҙәк - дәүләт хеҙмәттәренә бәйле бөтә мәсьәләләрҙе бер ерҙә хәл итеп була торған урын, тигән булалар. Ҡыҙымдың тыуыу тураһындағы таныҡлығын тиҙ генә алыштырырға кәрәк булғас, бер көндә эшләп бирерҙәр тип барҙым. 10 көндән һуң ғына әҙер буласаҡ, тинеләр. ЗАГС-ҡа барып, сират көтөргә тура килде-килеүен, әммә шул көндө үк алыштырып бирҙеләр. Шулай булғас, нимә тиһең инде?

Ләйсән Динисламова.

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

Телефон

8(34763) 320392

Электрон почта

[email protected]

Адресы

453260, Республика Башкортостан, г. Салават, пр. Нефтяников, 29