Яңы ҡорамалдар - яңы мөмкинлектәр

Ауыр атлетика секцияһына штангалар өсөн таяуҙар, йомшаҡ плиобокстар, күнекмәләр өсөн ике түшәмә, ноутбук, ике бамперлы диск һәм атлетика грифы ҡайтарылған, дөйөм суммаһы - 286 087,54 һум.
Футбол менән шөғөлләнеү өсөн 22538,26 һумлыҡ футбол һәм футзал туптары алынған.
Иң ҙур сумма - 1 140 324,45 һум, ул ҡаяға үрмәләү буйынса уңайлы һәм хәүефһеҙ күнекмәләр уҙғарыу өсөн кәрәкле йыһаз һәм ҡорамал алыуға йүнәлтелгән. Хәҙер спорт мәктәбендә ике автоматик страховка системаһы, ун страховка түшәге һ.б. бар.
Спорт мәктәбендә ҡаяға үрмәләү буйынса бүлексә күптән түгел генә асылһа ла, ҡалала был спорт төрө төрлө ойошмалар һәм коммерция, бюджет ойошмалары нигеҙендә уңышлы эшләй һәм үҫешә. Бүлексә тренеры Александр Козлов әйтеүенсә, кәрәкле ҡорамалдар исемлеге алдан ентекле уйланылған.
- Беҙҙең секция бындай ярҙамды тәүгә алды һәм быға бик шатбыҙ. Исемлекте төҙөгәндә ябай күнекмәләр өсөн генә түгел, ә тап спортсыларҙың профессиональ әҙерлеген күҙ алдында тоттоҡ. Тәү сиратта, автостраховканы файҙаланасаҡбыҙ. Ул - бик ҙур һәм ҡиммәтле яйланма. Хәҙер бындай автостраховканың булыуы ярыштар уҙғарғанда мотлаҡ шарт булып тора. Шулай уҡ бөтә кимәлдәге спортсылар өсөн страховка ҡоролмаһы алып ҡыуандыҡ, - ти тренер.
Киләсәктә профессиональ спорт-сылар булырға хыялланған бүлексә тәрбиәләнеүселәре алынған ҡора-малды баһалап өлгөргән дә инде. Был уларҙы юғары һөҙөмтәләргә һәм ҡаҙаныштарға ирешеү өсөн дә дәртләндереп торасаҡ.
- Күптән түгел Мәскәүҙә ҡаяға үрмәләү буйынса Европа чемпионаты уҙҙы. Унда Олимпиадаға ике һуңғы путевка уйнатылды. Әйткәндәй, уларҙы беҙҙең Рәсәй спортсылары алды. Балалар ҙа трансляцияны ҡыҙыҡһынып күҙәтте. Чемпионатта күпселек спортсылар беҙгә ҡайтарыл-ған ҡорамалдарҙы файҙалан-ды. Йыһаздарҙы һайлағанда иң яҡшыларына ғына өҫтөнлөк бирергә тырыштым. Балаларҙы был еңеүҙәргә этәрһен һәм Олимпиадаларға путевка оторға насип итһен, - тип һүҙен йомғаҡланы тренер Александр Козлов.