«Салауат - матур ҡала, ул тағы ла күркәмерәк булыр»

Рөстәм Ғәзизов Салауаттағы эш сәфәрен ҡаланың Индустриаль урамын ҡарауҙан башланы. Юлдың торошо тураһында фекер алышыу киң мәғлүмәт саралары вәкилдәренән тыш уҙҙы.
Һуңынан Рөстәм Ғәзизов Космонавтар бульварындағы музыка колледжы ҡаршыһында урынлашҡан аллеяға килде. Вице-премьерҙы төбәктең торлаҡ-коммуналь хужалыҡ министры урынбаҫары Арыҫланбәк Хәйҙәров, Салауат хакимиәте башлығы Марат Зәһиҙуллин, ҡала хужалығы идаралығы һәм подрядсы ойошма вәкилдәре оҙатып йөрөнө.

- Бөтә ҡатмарлы һәм сығымлы әҙерлек эштәре башҡарылған. Аллеяның әҙерлеге 70 процент тәшкил итә. Әлеге ваҡытҡа ҙур күләмдә булмаған эштәр ҡала: хәҙер парковка төҙөйбөҙ, асфальт юлдар менән ҙур бейеклек айырмаһы булған урындарға ҡара тупраҡ һалабыҙ. Был участкаларҙы тигеҙләгәндән һуң үҙәк аллеяға тотона алабыҙ. Әлегә беҙ быны эшләй алмайбыҙ, сөнки үҙәк юл йөк машиналары йөрөй торған берҙән-бер урын. Әгәр беҙ аллеяны төҙөкләндерә башлаһаҡ, йөк машиналары был урындарға килеп етә алмаясаҡ. Ә бындай соҡорҙарҙы ҡалдырырға теләмәйбеҙ, - тип һөйләй подрядсыһы вәкиле Артур Овакимян.

Яңы аллеяның йөрәге - үҙәк зона. Ул ағастар ултыртыу урынының уртаһынан үтә һәм һоро брусчатка менән түшәлә. Аллеяның ситтәрендә ҡыҙыл-көрән төҫтәге таяуҙар урынлаштырыла. Проектты эшләүселәрҙең ниәте буйынса, был төҫ «В.И. Лениндың тыуыуына 100 йыл тулыу хөрмәтенә социалистик ярыштарҙа еңеүселәргә» иҫтәлекле стеланың тарихи йөкмәткеһен сағылдыра. Был стелаға теймәйҙәр, киреһенсә, яңырталар: нигеҙен гранит менән биҙәп, хәрефтәре алтын менән ялатыласаҡ.

- Майҙансыҡты төҙөкләндереү инфраструктураны яңыртыуҙы, көндәлек ял өсөн уңайлы шарттар булдырыуҙы, сифатлы яҡтыртыуҙы һәм видеокүҙәтеү системаһын булдырыуҙы күҙ уңында тота. Стела тирәләй брусчатка менән ҡапланған майҙансыҡ төҙөйҙәр һәм унда эскәмйәләр урынлаштыралар, күп йыллыҡ сәскәләр ултыртыла. Биләмәлә төрлө йәштәге балалар өсөн заманса уйын ҡорамалдары, уларҙың ата-әсәләре өсөн эскәмйәләр һәм ял итеү урындары барлыҡҡа киләсәк, - тип аңлатма бирә ҡала хужалығы идаралығы начальнигы Юлия Будаева.

Премьер-министр урынбаҫары Рөстәм Ғәзизов, проектты әҙерләүселәрҙең пландары тураһында һорашып, деталдәрҙе аныҡлап, бер нисә иҫкәрмә яһаны.
- Яҡшы парк, ағастар күп, күләгә буласаҡ, - тине Рөстәм Ғәзизов. - Ә бына балалар майҙансыҡтарын ни өсөн ҡояш нурҙары ҡыҙыу төшкән ергә ҡуяһығыҙ. Әгәр ҙә күләгелерәк урын булһа, балаларға ла, әсәйҙәргә лә уңайлыраҡ булыр ине. Һеҙҙең спорт майҙансығы яҡшы тора, ул ағастар менән уратып алынған, улар эҫелә күләгәлә ҡала. Һәм үҙәк зонаны күләгәлә ҡалдырығыҙ, үҫентеләрҙе мөмкин тиклем ҡалдырырға тырышығыҙ. Ағастарҙың иҫке икәнен аңлайым, уларҙы яйлап периметр буйлап ҡырҡырға була, әммә күләгәләрҙе күберәк ҡалдырығыҙ. Әгәр халыҡ скейт-парк һайлаһа уны ағастан түгел, бетондан эшләргә кәрәк булыр, сөнки ағас тиҙ иҫкерә һәм оҙаҡҡа етмәй. Эттәрҙе йөрөтөү зонаһын булдырырға йыйынһағыҙ, уны торлаҡ йорттарҙан алыҫыраҡ урынлаштырығыҙ, кешеләргә ял итергә ҡамасауламаһын, һәм балалар майҙансығынан мөмкин тиклем алыҫ булһын, - тине Рөстәм Ғәзизов.

Ҡала мөхитен төҙөкләндереү проектының барлыҡҡа килеү тарихы
«Торлаҡ һәм ҡала мөхите» милли проектының «Уңайлы ҡала мөхите булдырыу» федераль проекты ярҙамы менән Салауат матурлана. 12 июндә ҡалала 2026 йылда төҙөкләндереүгә планлаштырылған йәмәғәт урындары өсөн тауыш биреү тамамлана. Салауаттарға ете участканың береһен һайларға тәҡдим итәләр: Космонавтар бульварындағы өс участкаһының береһен, Дзержинский урамындағы аллеяны йәки Матросов бульварының бер өлөшөн. Был йәмәғәт биләмәләрен төҙөкләндереүгә Салауатҡа субсидия бүлеүҙең төп шарттарының береһе - ҡала халҡының 27 меңдән дә кәм булмаған тауыш йыйыуы кәрәк.

Һандар теле менән
Космонавтар бульварындағы аллеяны төҙөкләндереү проекты 69,440 миллион һумға иҫәпләнгән. Тап ошондай суммаға «Рефтөҙөлөшпроект» яуаплығы сикләнгән йәмғиәтенең подряд ойошмаһы менән муниципаль контракт төҙөлә. Шуларҙың 63,3 миллионы - Рәсәй Федерацияһы бюджетынан, 1,3 миллионы - Башҡортостан Республикаһы бюджетынан һәм 4,8 миллионы ҡала бюджетынан бүленгән.

“Өн аралаш ете төш”
Башҡортостан Республикаһы Хөкүмәте Премьер-министры урынбаҫары Рөстәм Ғәзизов ҡараған киләһе объекттар - Ленин майҙаны һәм уға йәнәш Беренсе май урамы. Быйыл бында «Тормош өсөн инфраструктура» милли проекты сиктәрендә биләмәне төҙөкләндереү буйынса күләмле эштәр алып барыла. Хәтерегеҙгә төшөрәбеҙ, 2024 йылда Салауат “Өн аралаш ете төш” проекты менән еңеп, шуға бәйле быйыл бында төҙөлөш эштәре башланды.

Һандар теле менән
“Өн аралаш ете төш” проекты буйынса биләмәне төҙөкләндереү эштәренең дөйөм суммаһы 173 900 153,48 һум тәшкил итә (федераль бюджеттан 103 126 100,00 һум йүнәлтелгән, төбәк бюджетынан - 69 035 051,94, урындағы бюджеттан - 1 739 001,54 һум).

Ленин майҙаны һәм уға йәнәш Беренсе май урамын ҙур үҙгәрештәр көтә, шул уҡ ваҡытта ике объект та бер тематика менән берләштерелә. Төҙөкләндереү эштәренән һуң да үҙәк майҙан ҙур байрамдар уҙғарыу урыны булып ҡаласаҡ. Салауат Бродвейының Беренсе май урамындағы тарихы ла дауам итәсәк: яңы тротуар плиткаһы, ял итеү урындары, матур ағастар, өҫтәлдәр, эскәмйәләр һәм хатта бәүелсәктәр барлыҡҡа киләсәк. Әүҙем ял яратыусылар өсөн велосипед юлы эшләнә. Бродвейҙа асыҡ күргәҙмәләр һәм йәрминкәләр эшләйәсәк (бының өсөн кәштәләр барлыҡҡа киләсәк). «Нефтехимик» мәҙәниәт һарайы янындағы скверҙы ла үҙгәрештәр көтә. «Газпром нефтехим Салауат» яуаплығы сикләнгән йәмғәте ярҙамында тормошҡа ашырыласаҡ проект буйынса бында колоннадалы майҙан һәм ҡоро фонтан барлыҡҡа килә. Эштәр 26 июндән һуң, «Баллы бал» байрамы үткәс башлана.

- Әлеге ваҡытта эш пландарының 18 проценты үтәлгән. Проект сиктәрендә тротуарҙар яңыртыласаҡ, яңы яҡтыртыу, видеокүҙәтеү һәм урам мебеле ҡуйыласаҡ, визит-үҙәк һәм арт-объекттар, шул иҫәптән «Салауат» һәйкәле барлыҡҡа киләсәк. Яңыртылған урын ҡаланың яңы мәҙәни үҙәге булырға вәғәҙә итә. Йыл аҙағына әҙер һөҙөмтәне күрербеҙ, - тип билдәләне Рөстәм Ғәзизов.

Эш сәфәренә йомғаҡ яһап, вице-премьер эш барышынан ҡәнәғәт булыуын билдәләне.
- Быйыл Салауатта төҙөкләндереү буйынса эштәр байтаҡ, күләмле һәм етди. Эштәр әле башлана ғына. Һүҙ Космонавтар бульвары, Ленин майҙаны һәм уға йәнәш урынлашҡан Беренсе май урамы тураһында бара. Подрядсыларҙың ике объектҡа ла эште алып барыуын күрәм. Уларҙың һәр береһе буйынса ҡала етәкселеге менән бергә ентекле һөйләшеүгә кәрәкле тәҡдимдәр бар,- тине Башҡортостан Республикаһы Хөкүмәте Премьер-министры урынбаҫары. - Контракттар менән билдәләнгән ваҡытҡа бөтә эштәр ҙә башҡарыласаҡ һәм Салауат матур булһа ла, тағы ла сағыуыраҡ һәм күркәмерәк әүереләсәк, тип ышандыра алам.
Сөмбөл Шәйәхмәтова.
Алена Бизикина һәм Ольга Исакова фотолары.

«Салауат - матур ҡала, ул тағы ла күркәмерәк булыр»

Был хаҡта Башҡортостан Республикаһы Хөкүмәте Премьер-министры урынбаҫары Рөстәм Ғәзизов 30 майҙа Салауатҡа килгәндә белдерҙе.