- Ике ай элек “Самрау” халыҡ бейеү мәктәбе етәкселәре хәйриә концерты ойошторорға теләк белдерҙе. Беҙ был башланғысты ихлас күтәреп алдыҡ. Һөҙөмтәлә республика тарафынан шефлыҡҡа алынған Луганск Республикаһының Красный Луч мәктәбенә ярҙам ебәрергә ҡарар ителде. Бар йыйылған сумма унда белем алған егет-ҡыҙҙар өсөн уҡыу кәрәк-яраҡтары, компьютерҙар, принтерҙар һәм башҡа ошондай техникалар алырға йүнәлтеләсәк, - тип белдерҙе мәғариф идаралағы начальнигы Марина Вишева.
Ысынлап та, өс йыл элек нигеҙ һалынған “Самрау” халыҡ бейеүҙәре мәктәбе бөгөн ошондай концерттар ойоштора алырлыҡ баҫҡысҡа менде. Бигерәк тә быйылғы ижад миҙгеле улар өсөн иҫтәлекле ваҡиғалар һәм сағыу сығыштар булыуы менән тарихта ҡалды. Мәктәптең егет-ҡыҙҙары балалар араһында ойошторолған «Байыҡ» конкурсында беренсе, ә инде өлкәндәр төркөмө был бәйгенән Гран- при яулап ҡайтты.
- Быйылғы ижад миҙгеле бик күңелле уҙҙы. Республикабыҙҙың төп бейеү бәйгеһенән уңыштар менән ҡайтҡандан һуң, балалар менән Мәскәү ҡалаһын барырға йөрьәт иттек. Унда өс бейеүебеҙ ҙә беренсе урынға лайыҡ булды. Әлеге хәйриә концерты беренсеһе һәм һуңғыһы түгелдер тигән ышаныстабыҙ, артабан да салауаттарҙы үҙебеҙҙең бейеүҙәребеҙ менән ҡыуандырып торасаҡбыҙ, - тип һөйләй “Самрау” халыҡ бейеүҙәре мәктәбе етәксеһе Эмиль Һөйәрғолов.
Самрауҙар концертта халыҡ бейеүҙәре мәктәбе икәнен иҫбатлап, башҡорт һәм төрлө милләт халыҡтары бейеүҙәрен дә бер тигеҙ шәп башҡарҙы. Концерт программаһында коллективтың иң яҡшы номерҙары, шулай уҡ премьера постановкалары тәҡдим ителде. Һәм, әлбиттә, ҡәһәрле һуғыш, илһөйәрлек хистәрен сағылдырған хәрби бейеүҙәр күп булды был кистә.
- “Самрау” бейеү мәктәбенә ҡыҙҙарымды йөрөтәм. Бейеү тәү сиратта, физик яҡтан әҙерлек, ҡыҙҙарым бейеүгә йөрөй башлағандан алып диктантты ла яҡшыраҡ яҙа башланылар, уларҙың ритмдары барлыҡҡа килде. Беҙҙең ҡалала Гөлназ Азат ҡыҙы һәм Эмиль Шамил улы Һөйәрғоловтарҙың башҡорт халыҡ бейеүҙәре мәктәбен асып ебәреүҙәре милләтебеҙ ҙур файҙа, оло ҡыуаныс. Милли мәҙәниәтте, сәнғәтте һаҡлап ҡалыу, беҙҙең балаларҙы башҡорт мәҙәниәтен мөхитендә үҫтереү өсөн яҡшы аҙым, - тип һөйләй Рәмзиә Мәҡсүтова.
- Бында Самира һәм Ралина исемле ҡыҙҙарым йөрөй. Быға тиклем башҡа ансамблдәрҙә бейеп ҡараныҡ, әммә “Самрау”ға килгәс, барыһы ла оҡшаны һәм ошонда ҡалдыҡ. Хәҙер балалар мәктәптән һуң бейеүгә тип йүгереп сығып китәләр. Етәкселәребеҙ һәр балаға айырым ҡараш, иғтибар бүлә. Хәйриә концерты күрһәтеүебеҙҙе әйткәс, ғаиләбеҙ менән тулҡынланып ҡабул иттек, был изге эштә ҡатнашыуыбыҙға сикһеҙ шатбыҙ, - ти Регина Йәмилева.
Ил төкөрһә, күл була, ти халҡыбыҙҙың зирәк аҡылы. Ошондай хәйриә концерттары ярҙам йөҙөнән тыш, халҡыбыҙҙы берләштерә, балаларҙа Тыуған илдәренә ҡарата илһөйәрлек тойғолары һәм махсус хәрби операцияла ҡатнашыусы ир-егеттәр иҫән-һау Еңеү менән әйләнеп ҡайтыуына өмөт өҫтәй.
Сөмбөл Шәйәхмәтова.
Автор фотоһы.
