газета "Салауат"
+16 °С
Болотло
Бөтә яңылыҡтар
Мәҙәниәт
19 Июнь 2020, 12:23

Батыр рухы - беҙҙең йөрәктәрҙә

16 июндә башҡорт халҡының милли геройы Салауат Юлаевтың тыуыуына 266 йыл тулды. Ошо уңайҙан республика төбәктәрендә төрлө саралар үтте. Билдәле сәбәп менән уларҙың күбеһе онлайн тәртиптә ойошторолдо. Шулай ҙа, күп кеше йәлеп итмәй һәм бөтә санитар нормаларҙы үтәп, уның һәйкәленә тере сәскәләр һалыу һәм иҫкә алыуҙан ситтә ҡалыу мөмкин түгел. Ҡалабыҙҙың «Аҡбуҙат» йәмәғәт ойошмаһы һәм ата-әсәләр комитеты олуғ шәхесебеҙҙе данлап үтте.

- Бөгөн милли батырыбыҙ Салауат Юлаевтың тыуған көнө. Беҙ уның һәйкәленә сәскәләр һалып, уны иҫкә алып, ололап, ҙурлап китәйек тип йыйылдыҡ. Йәмәғәтселәр, Салауат батырҙың ҡаһарманлығына битараф булмағандар йыл да ошо ергә йыйылабыҙ, шиғырҙар һөйләп, йырҙар йырлап матур ғына сара ойоштора торғайныҡ. Быйыл коронавирус инфекцияһының таралыуын иҫкәртеү өсөн күмәк йыйылыу тыйыла, шуға күрә теләгән кешеләрҙең барыһы ла килә алмай. Шуныһы һис шикһеҙ, батырыбыҙ рухы һәр саҡ беҙҙең йөрәктәрҙә һаҡлана һәм уның даны илдә бер ваҡытта ла тынмаҫ, - тине «Аҡбуҙат» ойошмаһының рәйесе Ишбулат Иҫәнбаев.
Шулай уҡ ул Салауат Юлаевтың «Егеткә» тигән шиғырын уҡып ишеттерҙе. Тантаналы митинг-ка йыйылыусылар батырҙың рухына доға ҡылды. Шулай уҡ йәмәғәтселәр батыр һәйкәле тирәһен төҙөкләндереү, ойошманың артабанғы эш пландары хаҡында ла һөйләшеп алды.
Читайте нас: