Улар һәр ваҡыт хәүефһеҙлек һағында

Ҡалабыҙҙың эске эштәр бүлеге хеҙмәткәрҙәрен тәбрикләү тантанаһы “Ағиҙел” мәҙәни-ял үҙәгендә үтте. Салауат хоҡуҡ һаҡсыларын ҡотларға бик күп абруйлы ҡунаҡтар йыйылды: ҡала хакимиәте башлығы урынбаҫары Нил Ғабдрахманов, ҡала прокуроры Александр Иванов, БР Дәүләт Йыйылышы-Ҡоролтай депутаты Суфия Етеханова, дин әһелдәре, төрлө ведомство, ойошма вәкилдәре. Улар ҡала полицияһы хеҙмәткәрҙәре үҙҙәре алдында торған яуаплы бурыстарҙы уңышлы үтәүе, терроризмға, дини экстремизмға ҡаршы көрәшәүе, граждандарҙы яҡлауы, хоҡуҡ боҙоуҙарҙы, наркома-нияның таралыуын, үҫмерҙәрҙең һәм йәштәрҙең криминаль эшмәкәрлеккә юлығыуын иҫкәртеүе, ғөмүмән, йәмғиәт хәүефһеҙлеге һағына индергән баһалап бөткөһөҙ өлөшө хаҡында әйтте. Еңел булмаған хеҙмәттәрендә сыҙамлыҡ, ҡыйыулыҡ теләне. Хәрби бурысын үтәгәндә баш һалғандарҙы байрамға килеүселәр бер минут тынлыҡ менән иҫкә алды.

Хеҙмәткәрҙәр араһында эштәрендә юғары һөҙөмтәләргә ирешкән, енәйәтселеккә ҡаршы көрәш алып барыу һәм йәмәғәт тәртибен һаҡлау эшендә үҙенең намыҫлы хеҙмәте менән айырылып торғандар ҙа бар. Улар ҡала хакимиәтенең, эске эштәр органдарының Маҡтау грамоталары, Рәхмәт хаттары менән билдәләнде, бер төркөм хоҡуҡ һаҡсыларына миҙалдар ҙа тапшырылды. Ә һәүәҫкәр артистар хоҡуҡ һаҡсыларына үҙҙәренең йыр, бейеүҙәрен бүләк итте.