газета "Салауат"
+13 °С
Болотло
Бөтә яңылыҡтар
Общие статьи
14 Апрель 2020, 12:10

Салауаттар төшөнкөлөккә бирелмәй, берҙәмлек күрһәтә

Һәр кем үҙ иңенә төшкән заманды артмаҡлай. Бөгөн донъяны ялмаған GOVID-19 инфекцияһы беҙҙең быуын алдына ла ҙур һынауҙар ҡуйҙы. Короновирустан һаҡланыуҙың иң яҡшы сараһы тип үҙаллы изоляцияны иғлан иттеләр. Шулай булмай ни, һәр эштә тәртип яратҡан ҡытайҙар, ил етәкселеге сиргә торор өсөн ҡаты карантин индереү менән, бөтә талаптарҙы теүәл үтәргә тырышты һәм улар пандемияны еңеүгә өлгәшеп килә. Ә бына Италия, АҠШ, Испания был режимға күсеүҙе алдан хәстәрләмәне. Һөҙөмтәһе бик тә аяныслы, унда коронавирустан көнөнә меңәрләгән кеше һәләк була. Рәсәй Президенты тәүҙә, коронавирустың таралыуына ҡаршы тороу өсөн мәжбүри ял көндәрен бер аҙнаға иғлан иткәйне, һуңынан апрель аҙағына тиклем оҙайтты.

Бығаса бөтә ерҙә иркенләп йөрөгән халыҡ көнө буйы өйҙә ултырырға мәжбүр. Был хәлде төрлө кеше төрлөсә ҡабул итә. Әлеге заманда ярай интернет тигән нәмә бар, ул был ҡатмарлы осорҙо еңелерәк кисерергә ярҙам итә. Унда кешеләр өйҙәге ваҡытты нисек күңеллерәк үткәреү тәжрибәләре менән уртаҡлаша, бер-береһенең кәйефен күтәрә. Кемдер физик күнекмәләр менән шөғөлләнергә, кемдер өй йыйыштырырға һәм яҡындарыңды тәмле аштар менән һыйларға, өсөнсөләр китап уҡырға кәңәш бирә. Беҙҙең Салауат ҡалаһы кешеләре өйҙәге изоляция режимын һаҡлауға етди ҡараймы икән, буш ваҡыттарын нисек үткәрә икәнен белешеү өсөн бер нисә кешегә мөрәжәғәт иттек.
Рәмзиә Мәҡсүтова, Салауат башҡорт дәүләт драма театры актрисаһы:
- Әлеге ваҡытта беҙ ауылда. Карантин иғлан ителгәнгә тиклем үк әсәйем янына ҡайтҡайныҡ, бында яҡшыраҡ булыр, яҡын кешемә лә ярҙам да итербеҙ тип, ауылда ҡалдыҡ. Дистанцион уҡыуға килгәндә, тәүге көн ауырыраҡ булды, яйлап төшөнә башланыҡ, хәҙер инде балаларым үҙҙәре интернеттан асып дәрестәрен ҡарап, башҡарған эштәрен ебәрә ала.
Үҙаллы изоляция ваҡытында ҡыҙыҡлы шөғөлдәр уйлап табырға була. Бына мин дә үҙемде әүрәтеү өсөн ҡыҙыҡлы видеолар төшөрә башланым. Тәүҙә үҙебеҙҙең театр артистары күрһен тип кенә ебәргән инем, таралып китте лә, хәҙер уларҙы бөтә Башҡортостан ҡарай. Театрға эшкә йөрөмәһәк тә, ауылда эш етерлек. Бынан тыш, шиғырҙар, пьесалар уҡыйбыҙ.
Был карантин талаптарына килгәндә, уларҙы үтәргә кәрәктер, тип уйлайым. Һаҡланғанды Хоҙай һаҡлармын, тигән бит. Урамда йөрөп, берәй ауырыу эләктереп ҡайтып үҙеңдең яҡындарыңды хәүеф аҫтына ҡуйыу ғәмһеҙлек тип иҫәпләйем. Шуға күрә гәзит уҡыусыларға әйткем килә, зинһар өсөн өйҙә ултырығыҙ, сирҙең таралыуын юл ҡуймағыҙ.
Гүзәл һәм Рамазан Хәйбуллиндар, пенсионерҙар:
- Беҙ ни хәҙер оло йәштәбеҙ, комбинатта эшләп хаҡлы ялға сыҡтыҡ. Беҙгә күптән өйҙә ултырырға кәрәклеге тураһында шылтыратып әйттеләр. Беҙ талаптарҙы үтәргә тырышабыҙ. Үрҙән ҡушҡан өсөн дә түгел, ә ысынлап та һаҡланыу өсөн. Өлкән йәштәге кешеләрҙең иммунитеты ҡаҡшаған бит инде, сирҙе эләктереү ихтималлығы юғары. Бабай ғына иртән, кеше әҙерәк ваҡытта, магазинға сығып килә. Телевизор ҡарайбыҙ, әҙерәк зарядҡа эшләп алабыҙ, мин бәйләм менән ултырам, бабай китап, гәзит уҡый, ашарға бешерәбеҙ - шулай үтә ваҡытыбыҙ. Балаларға, ейән-ейәнсәрҙәргә килеп йөрөмәҫкә ҡуштыҡ, шулай яҡшыраҡ булыр, телефон бар бит, һөйләшеп, хәл белешеп торабыҙ.
Фәнис М.
- Беҙҙең эш дауам итә. «Газпром нефтехим Салауат»тың бер заводында эшләйем. Предприятиела дезинфекциялау саралары күрелә. Эшкә үҙемдең машинамда йөрөйөм. Ҡатыным һәм балалар өйҙә ултыра. Эштән ҡайтҡас ҡул-битте һабынлап йыуып, һаҡлыҡ сараларын үтәргә тырышам.
Тәүҙә балалар өйҙә ултырасаҡтарына шатланды, хәҙер мәктәпкә уҡырға барғы килә, дуҫтарҙы һағындыҡ, тиҙәр. Дистанцион уҡыу ауыр бирелә, этләнәләр. Кисен өй алдына ғына алып сығып уйнап инәләр. Эштән ҡайтҡас уларҙы төрлө шөғөлдәр менән мауыҡтырырға тура килә. Шахмат уйнайбыҙ, икеһе лә футболға йөрөй торғайны, ундағы күнекмәләрҙе иҫкә төшөрөп эшләп алабыҙ.
Читайте нас: