Быйыл кемдәр бушлай комплекслы тикшереү үтә ала?

Бушлай комплекслы медицина тикшереүе 18 йәштән өлкән граждандар өсөн ойошторола. Кешенең эшләү-эшләмәүе (уҡыуы) мөһим түгел. Әлеге хеҙмәттең маҡсаты - сирҙәрҙе йәки ил халҡының инвалидлығына һәм ваҡытынан алда вафат булыуына килтергән хәүеф факторҙарын иртә стадияларҙа асыҡлау.

2018 йылда 1928, 1931, 1934, 1937, 1940, 1943, 1946, 1949, 1952, 1955, 1958, 1961, 1964, 1967, 1970, 1973, 1976, 1979, 1982, 1985, 1988, 1991, 1997 йылдарҙа тыуған Рәсәй граждандары диспансеризация үтә.

Өс йылға бер тапҡыр үткәрелгән диспансеризацияны прописка урыны буйынса поликлиникала үтергә мөмкин. Салауатта ике поликлиникала ла тикшерелеп була. Бының өсөн паспорт һәм мотлаҡ медицина страховкаһы полисы кәрәк. Өҫтәмә мәғлүмәт алыу өсөн поликлиника регистратураһына мөрәжәғәт итергә.

Диспансеризация ике этапта уҙғарыла. Тәүгеһе - тикшереү, уның күләме йәшкә ҡарап билдәләнә, унан һуң участка терапевы беренсе этапҡа йомғаҡ яһай. Әгәр уның һөҙөмтәләре шик тыуҙырһа, табип тикшереү үткән кешене диспансеризацияның икенсе этабына йүнәлтмә бирә. Атап әйткәндә, пациентҡа өҫтәмә тикшереү үтергә кәрәк була - йәшкә һәм енескә ҡарап, белгестәр, лаборатор һәм диагностика процедуралары исемлеге билдәләнә.

Диспансерлаштырыу тәртибендә ҙур ғына үҙгәрештәр көтөлә. Атап әйткәндә, яман шеш ауырыуҙарын асыҡлауға төп иғтибар биреләсәк. 39 йәштән 51 йәшкә тиклемге ҡатын-ҡыҙҙар мотлаҡ рәүештә ике йылға бер тапҡыр маммографта тикшерелергә тейеш. 49 йәштән өлкән һәр кеше шулай уҡ ике йылға бер тапҡыр эсәк яман шешенә тикшереләсәк. Хәүеф төркөмөндә булған кешеләр өсөн иһә дөйөм медицина тикшереүе йыл һайын тәғәйенләнә.